இன்று மதியம் 2:35 மணிக்கு விண்ணில் பாய்கிறது சந்திரயான் 3
சந்திரயான்-3 இன்று விண்ணில் பாய தயாராகி வருகிறது! அந்த விண்கலத்தை சுமந்து செல்லும் 'எல்.வி.எம்.3 எம்-4' ராக்கெட்டின் சோதனை ஓட்டம் நிறைவு பெற்றதை அடுத்து, எரிபொருள் நிரப்பும் பணி நிகழ்ந்து வருகிறது. நிலவின் தென்துருவ பகுதியை ஆராய்ச்சி செய்ய அனுப்பப்படும் இந்த விண்கலத்தில், ஏற்கனவே அனுப்பப்பட்டு, தோல்வியடைந்த சந்திரயான்-2 விண்கலத்தில் ஏற்பட்ட தவறுகள் நீக்கப்பட்டுள்ளன என குறிப்பிடுகிறது இஸ்ரோ. தற்போதைய திட்டத்தில், ஆர்பிட்டர் இன்றி லேண்டர் மற்றும் ரோவர் மட்டுமே அனுப்பப்படவிருக்கிறது. சந்திராயன்-3 விண்கலத்தில் இருக்கும் ப்ரொபல்ஷன் மாடியூலே நிலவில் தரையிறங்கவிருக்கும் லேண்டர் மற்றும் ரோவருக்கு செயற்கைக்கோள் இணைப்பாகவும் பயன்படுத்தப்படவிருக்கிறது. இந்நிலையில், விண்கலத்தின் மாதிரியை, திருப்பதி கோவிலுக்கு எடுத்துச்சென்று, வழிபாடு செய்துள்ளனர் இஸ்ரோ குழுவினர். இதனைத்தொடர்ந்து, ராக்கெட்டின் கவுண்ட்டவுன் நேற்று துவங்கியது.
என்னென்ன அறிவியல் உபகரணங்கள் பயன்படுத்தப்படவிருக்கின்றன?
லேண்டரில், நிலவின் நிலஅதிர்வை அளவிடும் கருவியுடன் சேர்த்து மொத்தம் நான்கு அறிவியல் உபகரணங்கள் இடம்பெற்றிருக்கின்றன. அதில், நிலவின் மேற்பரப்பின் வெப்பத்தை அளவிடும் Chandra's Surface Thermophysical Experiment கருவி, நிலவின் இயக்கத்தை அறிந்து கொள்ளும் வகையிலான நாசாவின் LASER Retroreflector Array மற்றும் நிலவின் மேற்பரப்பில் ப்ளாஸ்மாவின் அடர்த்தியை அளவிடும் Langmuir Probe, ஆகிய கருவிகள் இடம்பெற்றிருக்கின்றன. லேண்டருடன் அனுப்பப்படும் ரோவரில், Alpha Particle X-ray Spectrometer மற்றும் LASER Induced Breakdown Spectroscope ஆகிய கருவிகள் இடம்பெற்றிருக்கின்றன. இவை நிலவின் மேற்பரப்பில் இருக்கும் கற்கள், பாறைகள் மற்றும் மண்துகள்களை ஆராய்ந்து, அவை என்ன விதமான இரசாயனத் துகள்கள் மற்றும் கலவைகளால் ஆகியிருக்கிறது என்பது குறித்து ஆராய்ச்சி செய்யும் வகையில் உருவாக்கப்பட்டிருக்கிறது.
