முருகன், சாந்தன் உள்ளிட்ட 4 பேரை சொந்த நாட்டிற்கு அனுப்ப ஏற்பாடு - மத்திய அரசு
செய்தி முன்னோட்டம்
திருச்சி மத்திய சிறை வளாகத்தில் உள்ள இலங்கை அகதிகள் முகாமில் தங்கவைக்கப்பட்டுள்ள முருகன், சாந்தன் உள்ளிட்ட 4 பேரை அவர்களது சொந்த நாடான இலங்கைக்கு அனுப்ப நடவடிக்கை எடுக்கப்படும் என்று மத்திய அரசு உயர்நீதிமன்றத்தில் பதிலளித்துள்ளது.
மறைந்த முன்னாள் பிரதமர் கொலை வழக்கில் ஆயுள்தண்டனை பெற்ற முருகன், நளினி உள்ளிட்டோரை உச்ச நீதிமன்றம் கடந்தாண்டு விடுவித்து உத்தரவு பிறப்பித்தது.
இவர்களுள் இலங்கை நாட்டினை தாயகமாக கொண்ட முருகன், சாந்தன், ஜெயக்குமார், ராபர்ட் பயஸ் உள்ளிட்ட 4 பேர் திருச்சியிலுள்ள அகதிகள் முகாமில் தங்கவைக்கப்பட்டுள்ளனர்.
இதனிடையே லண்டனில் வசிக்கும் தனது மகளுடன் சேர்ந்து வசிக்க விரும்புவதால் தனது கணவர் முருகனை விடுவிக்க கோரி நளினி உயர்நீதிமன்றத்தில் வழக்கு தொடர்ந்தார்.
பதில் மனு
வெளிநாட்டினருக்கான பதிவு அலுவலக மண்டப அதிகாரி பதில் மனு தாக்கல்
இந்த வழக்கு விசாரணைக்கு வந்தப்பொழுது இதுகுறித்து மத்திய மற்றும் மாநில அரசு பதிலளிக்குமாறு உத்தரவு பிறப்பித்தது.
அதன்படி தற்போது மத்திய அரசின் வெளிநாட்டினருக்கான பதிவு அலுவலக மண்டப அதிகாரி பதில் மனுவினை தாக்கல் செய்துள்ளார்.
அதில், ராஜீவ் காந்தி கொலை வழக்கில் கைதாகி விடுதலை செய்யப்பட்டுள்ள முருகன் உள்ளிட்ட 4 பேரும் இலங்கை நாட்டினை சேர்ந்தவர்கள். ஆனால் அவர்கள் உரிய ஆவணம் ஏதுமின்றி கள்ளத்தோணியில் இந்தியாவுக்குள் நுழைந்துள்ளனர்"என்று கூறியுள்ளார்.
மேலும் அவர் அந்த மனுவில், "அவர்களுக்கான பாஸ்போர்ட் மற்றும் இதர பயணத்திற்கான ஆவணங்களை அனுப்புமாறு இந்தியாவிலுள்ள இலங்கை துணை தூதரகத்திற்கு கடந்த டிசம்பர் மாதமே கடிதம் அனுப்பப்பட்டுவிட்டது. உரிய ஆவணங்கள் கிடைத்தவுடன் 4 பேரையும் இலங்கைக்கு திருப்பியனுப்ப நடவடிக்கை மேற்கொள்ளப்படும்" என்று குறிப்பிட்டுள்ளார்.