திருமணமானவர்கள் லிவ்-இன் உறவில் இருக்கலாமா? 2 முரணான தீர்ப்புகளை வழங்கிய அலகாபாத் உயர் நீதிமன்றம்
செய்தி முன்னோட்டம்
திருமணமான நபர்கள் சட்டப்பூர்வமாக விவாகரத்து பெறாமல் மற்றொருவருடன் லிவ்-இன் உறவில் இருப்பது குறித்து அலகாபாத் உயர் நீதிமன்றம் சமீபத்தில் வழங்கிய இரண்டு தீர்ப்புகள் நாடு முழுவதும் விவாதத்தை ஏற்படுத்தியுள்ளன. ஒரு அமர்வு விவாகரத்து இல்லாமல் இத்தகைய உறவு செல்லாது என்று கூறியுள்ள நிலையில், மற்றொரு அமர்வு இது சட்டப்படி குற்றமல்ல என்று தெரிவித்துள்ளது. இந்த இரண்டு தீர்ப்புகளும் தனிநபர் சுதந்திரம் மற்றும் திருமணத்தின் புனிதத்தன்மை ஆகியவற்றுக்கு இடையேயான சட்டப் போராட்டத்தை வெளிச்சம் போட்டுக் காட்டுகின்றன. கூடுதல் விவரங்கள் இங்கே:-
கடுமையான உத்தரவு
நீதிபதி விவேக் குமார் சிங்கின் கடுமையான உத்தரவு
மார்ச் 20 அன்று நீதிபதி விவேக் குமார் சிங் தலைமையிலான ஒரு தனி நீதிபதி அமர்வு, திருமணமானவர்கள் விவாகரத்து பெறாமல் லிவ்-இன் உறவில் இருப்பதை ஏற்க மறுத்தது. ஏற்கனவே திருமணமான ஒரு ஆணும் பெண்ணும் (வெவ்வேறு துணைவர்களுடன்), தங்கள் குடும்பத்தினரிடம் இருந்து பாதுகாப்பு கோரித் தொடர்ந்த வழக்கை நீதிமன்றம் தள்ளுபடி செய்தது. விவாகரத்து பெறாமல் மற்றொருவருடன் குடும்பம் நடத்துவது சட்டவிரோதமானது என்றும், இது இருதார மணம் போன்ற குற்றங்களுக்குக் கவசமாக அமைந்துவிடும் என்றும் நீதிமன்றம் எச்சரித்தது.
சட்டப்பூர்வ உரிமை
துணையின் சட்டப்பூர்வ உரிமை மற்றும் தனிநபர் சுதந்திரம்
இந்த வழக்கில் அரசுத் தரப்பு வாதத்தை ஏற்றுக்கொண்ட நீதிமன்றம், ஒருவரின் தனிநபர் சுதந்திரம் என்பது அவரது சட்டப்பூர்வமான துணையின் உரிமையைப் பறிப்பதாக இருக்கக்கூடாது என்று குறிப்பிட்டது. "சட்டப்படி திருமணம் செய்துகொண்ட ஒரு துணைக்கு, தனது துணையின் உடனிருக்கும் உரிமை உண்டு. அந்த உரிமையைத் தனிநபர் சுதந்திரம் என்ற பெயரில் தட்டிப்பறிக்க முடியாது" என்று நீதிபதி தெரிவித்தார். பாதுகாப்பு கோரிய தம்பதியினருக்கு எந்தவொரு சட்டப்பூர்வ உரிமையும் இல்லை என்பதால், அவர்களுக்கு நீதிமன்றம் பாதுகாப்பு வழங்க மறுத்துவிட்டது.
குற்றமல்ல
இரண்டாவது தீர்ப்பு: "இது குற்றமல்ல" - டிவிஷன் பெஞ்ச் அதிரடி
முதல் தீர்ப்பு வெளியான சில நாட்களிலேயே, நீதிபதிகள் ஜே.ஜே.முனீர் மற்றும் தருண் சக்சேனா அடங்கிய டிவிஷன் பெஞ்ச் இதற்கு நேர்மாறான ஒரு கருத்தைத் தெரிவித்தது. 18 வயது பெண்ணுடன் வசிக்கும் திருமணமான ஒரு நபருக்கு எதிரான வழக்கை விசாரித்த நீதிமன்றம், "வயது வந்த இருவர் பரஸ்பர சம்மதத்துடன் லிவ்-இன் உறவில் இருப்பது இந்திய சட்டப்படி குற்றமல்ல" என்று கூறியது. ஒழுக்க நெறிகளையும் சட்டத்தையும் ஒன்றாகக் குழப்பிக்கொள்ளக் கூடாது என்றும் அந்த அமர்வு தெளிவாகச் சுட்டிக்காட்டியது.
காவல்துறை
காவல்துறையின் கடமை மற்றும் இடைக்காலப் பாதுகாப்பு
தன்னார்வத்துடன் ஒரு ஆணுடன் வாழும் பெண்ணைப் புகாரின் பேரில் காவல்துறையினர் தொந்தரவு செய்யக்கூடாது என்று டிவிஷன் பெஞ்ச் உத்தரவிட்டது. வயது வந்த இருவர் தங்களுக்குப் பாதுகாப்பு கோரும்போது, அவர்களுக்குப் பாதுகாப்பு வழங்குவது அதிகாரிகளின் கடமை என்று நீதிபதிகள் வலியுறுத்தினர். அந்தப் பெண்ணின் குடும்பத்தினர் அவர்களைத் தொடர்புகொள்ளக் கூடாது என்றும், உள்ளூர் காவல் கண்காணிப்பாளர் அவர்களின் பாதுகாப்பை உறுதி செய்ய வேண்டும் என்றும் நீதிமன்றம் உத்தரவிட்டுள்ளது. இது தனிநபர் சுயாட்சிக்கு முக்கியத்துவம் அளிக்கும் தீர்ப்பாகப் பார்க்கப்படுகிறது.
சட்டச் சிக்கல்
சட்டச் சிக்கலும் தற்போதைய நிலைப்பாடும்
இந்த இரண்டு தீர்ப்புகளும் திருமணமானவர்களின் லிவ்-இன் உறவு குறித்த சட்ட நிலைப்பாட்டில் இன்னும் ஒரு தெளிவற்ற சூழல் நிலவுவதைக் காட்டுகின்றன. ஒருபுறம் திருமண உறவின் புனிதமும் துணையின் உரிமைகளும் முன்னிறுத்தப்படுகின்றன. மறுபுறம் வயது வந்தவர்களின் சம்மதமும், கிரிமினல் குற்றம் ஏதும் இல்லாத நிலையில் அவர்கள் இணைந்து வாழும் உரிமையும் பேசப்படுகின்றன. இந்த விவகாரம் வரும் காலங்களில் உச்ச நீதிமன்றத்தின் மூலம் ஒரு இறுதித் தெளிவைப் பெறும் என்று சட்ட வல்லுநர்கள் எதிர்பார்க்கின்றனர்.