வெளிமாநில பதிவெண் கொண்ட ஆம்னி பேருந்துகளை இயக்கினால் கடும் நடவடிக்கை
செய்தி முன்னோட்டம்
சமீபத்தில் சென்னையில் ஆம்னி பேருந்து உரிமையாளர்கள் சங்கத்துடன் தமிழக போக்குவரத்துத்துறை அதிகாரிகள் பேச்சுவார்த்தை நடத்தியுள்ளனர்.
அப்போது போக்குவரத்து ஆணையர் சண்முகசுந்தரம், "தமிழ்நாடு மாநிலத்தில் வரும் டிசம்பர் 16ம் தேதிக்கு பிறகு வெளிமாநில பதிவெண் கொண்ட ஆம்னி பேருந்துகளை இயக்கக்கூடாது. அதனை மீறி இயக்கினால் கடும் நடவடிக்கை எடுக்கப்படும்" என்று எச்சரிக்கை விடுத்துள்ளார்.
மேலும் அவர், "தமிழகத்தில் 652 வெளிமாநில ஆம்னி பேருந்துகள் இயக்கப்படுகிறது. இதனால் அரசுக்கு ஒரு ஆண்டிற்கு ரூ.28.16 கோடி இழப்பீடு ஏற்படுகிறது" என்றும் தெரிவித்துள்ளார்.
இதனை தொடர்ந்து அவர், "இதன் காரணமாகவே இனி வெளிமாநில பதிவெண் கொண்ட ஆம்னி பேருந்துகளை இயக்க தடை விதிக்கப்படுகிறது" என்றும் விவரித்துள்ளார்.
அரசு
கூடுதல் கட்டணம் வசூலிக்க கூடாது - தமிழக அரசு
இதனிடையே, டிசம்பர் 16ம் தேதிக்குள் வெளிமாநில பதிவு எண்களை தமிழக பதிவு எண்ணாக மாற்றி கொள்ளுமாறு கூறியுள்ளார்.
ஆம்னி பேருந்து உரிமையாளர்கள் இதற்கான கால அவகாசத்தினை நீடிக்குமாறு கேட்டுக்கொண்டதால் டிசம்பர் 16ம் தேதி கால அவகாசம் நீட்டிக்கப்பட்டுள்ளது என்றும் தெரிவித்துள்ளார்.
தமிழகத்தில் தீபாவளி பண்டிகை காலம் துவங்கியுள்ள நிலையில், மக்கள் தங்கள் சொந்த ஊர்களுக்கு செல்ல பயணம் மேற்கொள்வர். இதனை பயன்படுத்தி பல ஆம்னி பேருந்துகள் தங்கள் கட்டணத்தை அதிகளவு உயர்த்துவது என்பது வழக்கமான ஒன்றாக உள்ளது.
இந்நிலையில், கூடுதல் கட்டணம் வசூலிக்கப்படுவதாக புகார்கள் எழுந்தால், குறிப்பிட்ட பேருந்துகள் பறிமுதல் செய்யப்படும் என்றும் தமிழக அரசு தெரிவித்துள்ளது.