"வீட்டை எழுதி வாங்கிய விஜயகாந்த்": குற்றம் சுமத்தும், தயாரிப்பாளர் VA துரை
கேப்டன் விஜயகாந்த், அவர் பெயருக்கு ஏற்றார் போலவே கோலிவுட்டின் கேப்டனாக கோலோச்சியவர். பல வெற்றி படங்களை தந்த விஜயகாந்த், பலருக்கும் உதவுபவர் என்று திரையுலகினர் அனைவராலும் புகழப்படுபவர். தற்போது உடல்நலம் குன்றி இருக்கும் போதும், அவரது கட்சி அலுவலகம் தேடி வருபவர்களுக்கு தன்னால் இயன்ற உதவியை செய்வதாக பரவலான பேச்சு உள்ளது. ஆனால், அவர் மீது இப்போது ஒரு குற்றச்சாட்டை வைத்துள்ளார் தயாரிப்பாளர் V.A.துரை. 'பிதாமகன்', 'கஜேந்திரா' போன்ற படங்களை தயாரித்தவர் வி.ஏ.துரை. சமீபத்திய செய்திகளின்படி, இவர் சிலஆண்டுகளாகவே நீரிழிவு நோயால் பாதிக்கப்பட்டுள்ளார் என தெரியவந்துள்ளது. அதுகுறித்து அவர் ஒரு வீடியோ வெளியிட்டிருந்தார். அதில், தனக்கு சிகிச்சைக்கு கூட பணமின்றி தவித்து வருவதாகவும், நடிகர் ரஜினிகாந்த் உதவ வேண்டும் எனவும் கூறி இருந்தார்.
விஜயகாந்த் மீது குற்றம்சாட்டிய துரை
அவரின் வீடியோ வைரல் ஆனதை அடுத்து, திரையுலக பிரபலங்கள் பலர் அவருக்கு பண உதவி செய்தனர். நடிகர் சூர்யா, மருத்துவ செலவுக்காக ரூ.2 லட்சத்தை வழங்கி இருந்தார். மேலும் நடிகர் கருணாஸ் ரூ.50 ஆயிரம் வழங்கியதாக செய்திகள் தெரிவிக்கின்றன. இவர்களுடன், நடிகர் ராகவா லாரன்ஸும் ரூ 5. லட்சம் வரை வழங்குவதாக அறிவித்தார். மறுபுறம் ரஜினிகாந்த், தன்னால் இயன்ற உதவியை செய்வதாக வாக்கு தந்தார் எனக்கூறப்பட்டது. இந்நிலையில், தயாரிப்பாளராக இருந்த காலத்தில், தான் ஒரு விஜயகாந்த் படம் எடுத்ததாகவும், அந்த படம் சரியாக ஓடவில்லை என்றும், துரையால், விஜயகாந்திற்கு சம்பளம் தரமுடியாத நிலை ஏற்பட்டதாகவும், அப்போது விஜயகாந்த், சம்பளத்திற்கு பதிலாக தன்னுடைய வீட்டை எழுதி வாங்கி கொண்டதாகவும் தற்போது புகார் தெரிவித்துள்ளார் துரை.
