பொன்னியின் செல்வன் திரைப்படத்தை தெலுங்கு ரசிகர்கள் விமர்சிப்பது குறித்து மணிரத்னம் 'நச்' பதில்
செய்தி முன்னோட்டம்
பொன்னியின் செல்வன் இரண்டாம் பாகம், வெளியீட்டிற்கு தயாராக இருக்கிறது. வரும் ஏப்ரல் 28 அன்று, திரையரங்குகளில் வெளியாகப்போகிறது.
இதனிடையே படக்குழுவினர் படத்திற்கான ப்ரோமோஷன் வேலைகளில் தீவிரமாக உள்ளனர்.
சென்ற வாரம் துவங்கிய ப்ரோமோஷன் பணிகளின் ஒரு பகுதியாக, சென்னையில் படக்குழு-நிருபர்கள் சந்திப்பிற்கு ஏற்பாடு செய்யப்பட்டிருந்தது.
அப்போது, படத்தை குறித்து, படக்குழுவின் அடுத்தகட்ட திட்டங்கள் குறித்தும் கேட்கப்பட்டது.
அப்போது நிருபர் ஒருவர், தமிழ் படங்கள் குறிப்பாக, பொன்னியின் செல்வன் போன்ற வரலாற்று படங்களுக்கு தெலுங்கு ரசிகர்கள் எதிர்மறை விமர்சனங்கள் வைப்பது குறித்தும், பாகுபலி திரைப்படத்தோடு ஒப்பிட்டு பேசுவது குறித்தும் கேள்விகள் கேட்கப்பட்டது.
இதற்கு மணிரத்னம் பெருந்தன்மையாக பதிலளித்த விதம் பலரின் பாராட்டை பெற்றாலும், நிருபரின் அந்த கேள்வி பலத்த எதிர்ப்பை கிளப்பி உள்ளது.
பொன்னியின் செல்வன்
"கருத்து கூற அவர்களுக்கு உரிமை உண்டு"
நிருபரின் கேள்விக்கு, மணிரத்னம், "ஒவ்வொருவருக்கும், ஒரு கருத்தும், ரசனையும் உண்டு. அவர்களைக் கேள்வி கேட்க கூடாது என கூறமுடியாது. எங்கள் (படத்தை) திட்டத்தைப் பற்றி நாங்கள் நம்பிக்கையுடனும் பெருமையுடனும் இருக்கிறோம், அதுதான் முக்கியம்" என கூறினார்.
இதேபோல, வேறு ஒரு சமயத்திலும், மணிரத்னத்திடம், பாகுபலி படத்தை பற்றியும், ராஜமௌலி பற்றியும் கேள்வி கேட்டபோது, "ஒரு படத்தை, இரு பாகங்களாக பிரித்து எடுத்தாலும், ரசிகர்களின் சுவாரஸ்யத்தை தக்க வைக்கமுடியும் என நிரூபித்து காட்டியவர் ராஜமௌலி. அவரின் பாகுபலி தந்த நம்பிக்கையில் தான், நான் தைரியமாக பொன்னியின் செல்வனை எடுக்க முடிந்தது" என கூறினார்.