விவாதங்களில் எல்லை மீறினால் மியூட் அல்லது கட் செய்ய வேண்டும்; தொலைக்காட்சி சேனல்களுக்கு மத்திய அரசு எச்சரிக்கை
செய்தி முன்னோட்டம்
தொலைக்காட்சி சேனல்கள் செய்தி விவாதங்கள் மற்றும் விவாதிக்கப்படும் தலைப்புகளில் கடுமையான தலையீட்டுக் கட்டுப்பாடுகளை கடைப்பிடிக்க வேண்டும் என்று மத்திய அரசு அறிவுறுத்தியுள்ளது. வகுப்புவாத, தேசத்திற்கு எதிரான, அவதூறான மற்றும் வன்முறையைத் தூண்டும் கருத்துக்கள் ஒளிபரப்பாவதைத் தவிர்க்க வேண்டும் என மத்திய தகவல் மற்றும் ஒளிபரப்பு அமைச்சகம் தெரிவித்துள்ளது. கேபிள் தொலைக்காட்சி நெட்வொர்க் விதிகளைத் தீவிரமாகப் பின்பற்றுமாறு அனைத்துப் பிரைவேட் சாட்டிலைட் தொலைக்காட்சி சேனல்களுக்கும் இந்த புதிய அறிவுறுத்தல் வழங்கப்பட்டுள்ளது. கூடுதல் விபரங்கள் இங்கே:-
நடவடிக்கை
விவாதங்களின்போது மியூட் மற்றும் ஒளிபரப்புத் துண்டிப்பு நடவடிக்கை
தவறான அல்லது அவதூறான மொழிகளைப் பயன்படுத்துபவர்களை கட்டுப்படுத்தவும், அத்தகைய கருத்துக்கள் பொதுவெளியில் ஒளிபரப்பாவதைத் தவிர்க்கவும் உடனடி திருத்த நடவடிக்கைகளை சேனல்கள் எடுக்க வேண்டும்.
விவாதங்களின்போது தேவையின்றி எல்லை மீறுபவர்களை மியூட் செய்வது, நிகழ்ச்சிகளுக்கு நடுவே குறுக்கிடுவது அல்லது தேவைப்பட்டால் ஒளிபரப்பு துண்டிக்கப்படுவதை உறுதி செய்ய வேண்டும்.
மேலும், முறையான முன்னெச்சரிக்கை நடவடிக்கைகளையும், பொருத்தமான மறுப்புரைகளையும் தயாரிப்புப் பணியின்போது சேனல்கள் மிகுந்த கவனத்துடன் நடைமுறைப்படுத்த வேண்டும்.
துல்லியமான செய்தி
பயங்கரவாத எதிர்ப்பு நடவடிக்கைகள் மற்றும் துல்லியமான செய்திகள்
பாதுகாப்புப் படையினரின் பயங்கரவாத எதிர்ப்பு நடவடிக்கைகளின்போது நேரலை ஒளிபரப்பு செய்வதை முழுமையாகத் தவிர்க்க வேண்டும் என்று அமைச்சகம் எச்சரித்துள்ளது.
குற்ற சம்பவங்கள் மற்றும் வன்முறைகள் தொடர்பான செய்திகளை வெளியிடும்போது, வதந்திகளுக்கும் அரைகுறை தகவல்களுக்கும் இடமளிக்காமல் சரிபார்க்கப்பட்ட உண்மைகளின் அடிப்படையிலேயே செய்திகள் தயாரிக்கப்பட வேண்டும்.
இயற்கை இடர்பாடுகள் மற்றும் விபத்துகளின்போது தேவையற்ற பீதியைத் தவிர்க்க கால முத்திரைகளுடன் கூடிய உண்மையான தகவல்களை மட்டுமே பார்வையாளர்களுக்கு ஊடகங்கள் வழங்க வேண்டும்.
செயற்கை நுண்ணறிவு
அதிகாரப்பூர்வ வரைபடங்கள் மற்றும் செயற்கை நுண்ணறிவு பயன்பாடு
அமைச்சகத்தின் அறிவுறுத்தலின்படி, தொலைக்காட்சி விவாதங்கள் மற்றும் வரைபட காட்சிகளில் இந்தியாவின் அதிகாரப்பூர்வ எல்லைகளைக் குறிக்க சர்வே ஆஃப் இந்தியா ஒப்புதல் அளித்த வரைபடங்களை மட்டுமே கட்டாயமாக பயன்படுத்த வேண்டும்.
மேலும், செயற்கை நுண்ணறிவு (ஏஐ) தொழில்நுட்பத்தை விவரிக்கவும் உதவிகரமாகவுமே பயன்படுத்த வேண்டுமே தவிர, செய்திகளின் நம்பகத்தன்மையையும் உண்மைத் தன்மையையும் அது எந்த வகையிலும் பாதிக்கக் கூடாது.
உச்ச நீதிமன்றத்தின் வழிகாட்டுதலின்படி, பாலியல் குற்றங்களுக்கு ஆளானவர்களின் அடையாளங்கள் வெளிவராதவாறு ஊடகங்கள் சிறப்பு கவனம் செலுத்த வேண்டும்.