'96 பட பாணியில் ரீயூனியன் செய்து மகிழ்ந்த தனுஷ்
நடிகர் தனுஷ், தன்னுடைய இளமை காலங்களை, சென்னை கோடம்பாக்கத்தில், சாலிகிராமத்தில் கழித்ததாக கூறுவார். கல்லூரி படிப்பை தொடங்கும் முன்னரே, நடிக்க வந்துவிட்டார் தனுஷ். 'துள்ளவதோ இளமை' படத்தின் மூலமாக அறிமுகமான அவர், தொடர்ச்சியாக வந்த எதிர்மறை விமர்சனங்கள் அனைத்தையும், ஏணிகளாக மாற்றிக்கொண்டு, தற்போது தேசிய விருதுகளை குவிக்கும், ஹாலிவுட் இயக்குனர்களால் தேடப்படும் நடிகராக அசுர வளர்ச்சி அடைந்துள்ளார். நிற்க நேரமில்லாமல், தொடர்ச்சியாக படங்களில் கமிட் ஆகி வரும் தனுஷ், தற்போது 'கேப்டன் மில்லர்' படத்தின் ஷூட்டிங்கை முடித்துள்ளார். தொடர்ந்து, அவரே இயக்கப்போகும் ஒரு திரைப்படம், பாலிவுட் திரைப்படம், வடசென்னை 2, ஆயிரத்தில் ஒருவன் 2 என வரிசையாக படங்கள் அவர் கைவசம் உள்ளன.
பள்ளி ரீ யூனியனில் கலந்துகொண்ட தனுஷ்
இந்நிலையில், தன்னுடைய பள்ளி தோழர்கள் அனைவரையும் ஒன்றிணைத்து ஒரு கெட்-டுகெதர் ஏற்பாடு செய்துள்ளார் தனுஷ். '96 படப்பாணியில் நடைபெற்ற இந்த ரீ யூனியன், சென்னையிலுள்ள ஒரு நட்சத்திர ஹோட்டலில் நடைபெற்றதாகவும், இந்த ரீ யூனியனில் அவருடன் பள்ளியில் படித்த பலர் கலந்து கொண்டனர் எனவும் கூறப்படுகிறது. இந்த விழாவை தனுஷே மேற்பார்வையிட்டு நடத்தியதாக செய்திகள் கூறுகின்றன. அந்த ரீயூனியனில் எடுக்கப்பட்ட புகைப்படங்கள் தற்போது, இணையத்தில் வைரலாகி வருகின்றன. இந்த சந்திப்பின் போது தன்னுடைய பள்ளிப்பருவ நினைவுகளை நண்பர்களோடு பகிர்ந்து மகிழ்ந்துள்ளார் தனுஷ்.
