என்னது, பிக் பாஸ் விஜய் சேதுபதிக்கு சம்பளம் இவ்ளோவா! அப்போ போட்டியாளர்களுக்கு?
கடந்த அக்டோபர் 6ஆம் தேதி பிக் பாஸ் தமிழ் சீசன் 8 18 போட்டியாளர்களுடன் கலகலப்புடன் தொடங்கியது. நடிகர் கமல்ஹாசன் விலகிய நிலையில், இந்த சீசனில் நடிகர் விஜய் சேதுபதி புதிய தொகுப்பாளராக இணைந்தார். முதல் வாரம் கலகலப்பாக செல்லும் என எதிர்பார்க்கப்பட்ட நிலையில், 24 மணிநேரத்தில் போட்டியாளர்களில் ஒருவரான சச்சனா எவிக்சன் மூலம் வெளியேற்றப்பட்டார். இந்நிலையில், தற்போது இந்த நிகழ்ச்சியின் தொகுப்பாளர் மற்றும் போட்டியாளர்களுக்கு வழங்கப்படும் ஊதியம் குறித்த தகவல் வெளியாகியுள்ளது. இது குறித்து சினிமா விகடனின் இன்ஸ்டாகிராம் பக்கத்தில் வெளியிடப்பட்டுள்ள ஒரு பதிவில் நிகழ்ச்சியின் தொகுப்பாளர் விஜய் சேதுபதிக்கு இந்த சீசனிற்காக மொத்தம் ரூ.15 முதல் 18 கோடி வரை சம்பளம் கொடுக்கப்படுவதாக தெரிவித்துள்ளது.
போட்டியாளர்களுக்கான சம்பளம்
இந்த அறிக்கையின்படி, நிகழ்ச்சியில் போட்டியாளர்களாக கலந்துகொண்டுள்ள 18 பேரில் நடிகர் ரஞ்சித் மற்றும் தயாரிப்பாளர் ரவீந்தர் சந்திரசேகரனுக்கு மட்டும் அதிகபட்சமாக ஒரு நாளைக்கு 50,000 ரூபாய் வழங்கப்படுகிறது. அதே நேரத்தில், சச்சனா மற்றும் தீபக் ஆகியோருக்கு ஒரு நாளைக்கு 30,000 ரூபாயும், முத்துக்குமரன், சவுந்தர்யா நஞ்சுண்டன், கானா ஜெஃப்ரி ஆகியோருக்கு ஒரு நாளைக்கு 10,000 ரூபாயும் வழங்கப்படுவதாகக் கூறப்பட்டுள்ளது. இவர்களைத் தவிர எஞ்சிய 11 போட்டியாளர்களாக தர்ஷிகா, விஜே விஷால், அன்ஷிதா, ஆர்ஜே ஆனந்தி, பவித்ரா ஜனனி, சத்யா, அர்னவ், தர்ஷா குப்தா, ஜாக்குலின், சுனிதா, அருண் ஆகியோருக்கு ஒருநாளைக்கு 25,000 ரூபாய் சம்பளம் வழங்கப்படுவதாக அதில் தெரிவிக்கப்பட்டுள்ளது. எனினும், இது தோராயமான மதிப்பீடு மட்டுமே என்றும், அந்த இன்ஸ்டாகிராம் பதிவில் குறிப்பிடப்பட்டுள்ளது.
