நடிகர் சங்க கூட்டத்திற்கு சைக்கிளில் சென்ற விஷால்; வைரலாகும் வீடியோ
நடிகர் சங்க கூட்டத்திற்கு நடிகர் விஷால் சைக்கிளில் வந்த வீடியோ இணையத்தில் வெளியாகி வைரலாகி வருகிறது. நடிகர் விஷால் 2026 சட்டசபைத் தேர்தலில் களமிறங்க உள்ளதாக ஏற்கனவே அறிவித்துள்ளது குறிப்பிடத்தக்கது. இந்நிலையில், முன்பு நடிகர் விஜய் சைக்கிளில் சென்று வாக்களித்ததை போன்று, தற்போது நடிகர் விஷால் நடிகர் சங்க கூட்டத்திற்கு சைக்கிளில் சென்றுள்ளார். இதைப் பார்த்த பலரும் விஷால் சைக்கிளில் சென்றதில் என்ன தவறு எனக் கேட்டாலும், விஷாலின் செயலை சிலர் கலாய்த்து வருகின்றனர். இதற்கிடையே, விஷால் சைக்கிளில் செல்லும்போது பின்னே வந்த அரசு பேருந்துக்கு செல்வதற்கு இடம் தரவில்லை என ஒரு சர்ச்சை வெடித்துள்ளது. அதே நேரம் பேருந்து ஹாரன் அடித்ததும் வழிவிட்டு விலகினார் என்றும் சிலர் கூறுகின்றனர்.
விஷால் சைக்கிளில் சென்ற வீடியோ
நடிகர் சங்க கூட்டத்தில் எடுக்கப்பட்ட தீர்மானங்கள்
நடிகர் சங்க கூட்டம் சென்னை தேனாம்பேட்டையில் உள்ள காமராஜர் அரங்கில் ஞாயிற்றுக்கிழமை (செப்டம்பர் 8) நடைபெற்றது. இதில் பல்வேறு விஷயங்கள் குறித்து தீர்மானங்கள் நிறைவேற்றப்பட்டுள்ளன. அதன்படி, நடிகர் சங்கத்தில் தற்போது பொறுப்பாளர்களாக உள்ளவர்களின் பதவிக்காலம் அடுத்த ஆண்டு முடிவடையும் நிலையில், மேலும் மூன்று ஆண்டுகளுக்கு நீட்டிக்கப்பட்டுள்ளது. நடிகர் சங்க கட்டிடத்தின் கட்டுமானப் பணிகள் தற்போது நடந்து வரும் நிலையில், அதை தொய்வின்றி நடத்தி முடித்திட ஏதுவாக இந்த முடிவு எடுக்கப்பட்டுள்ளது. நடிகர் சங்க கட்டிடம் கட்டுவதற்காக வாங்கப்பட்ட கடனை அடைப்பதற்காக நட்சத்திர கலைவிழா நடத்த முடிவு செய்யப்பட்டுள்ளது. மேலும், பாலியல் புகாரில் சிக்கும் நபர்களுக்கு சினிமா துறையில் பணியாற்ற தடை விதிக்கவும் இதில் முடிவு செய்யப்பட்டுள்ளது.
