'ஜெயிலர்' படத்தின் அதிரடி வெற்றி; இயக்குனர் நெல்சனுக்கு வாழ்த்து கூறிய விஜய்
நெல்சன் இயக்கத்தில் ரஜினிகாந்த், ரம்யா கிருஷ்ணன், யோகி பாபு, மோகன்லால், ஷிவ் ராஜ்குமார், மோகன்லால், ஜாக்கி ஷெரிப் உள்ளிட்ட பெரிய நடிகர்கள் பட்டாளமே ஒன்றிணைந்து நடித்து நேற்று(ஆகஸ்ட்.,10) வெளியான திரைப்படம் தான் 'ஜெயிலர்'. இப்படம் தமிழகத்தில் 900க்கும் மேற்பட்ட திரையரங்குகளில் வெளியாகியுள்ள நிலையில், உலகம் முழுவதும் 4000க்கும் அதிகமான திரையரங்குகளில் வெளியிடப்பட்டுள்ளது. சன் பிக்சர்ஸ் தயாரிப்பில், அனிருத் இசையில் அமைந்துள்ள இப்படம் ரஜினி ரசிகர்களால் தற்போது கொண்டாடப்பட்டு வருகிறது. முதல்நாள் வசூலில் தமிழ்நாட்டில் மட்டும் இப்படம் ரூ.29.46 கோடி வசூல் செய்துள்ளது என்று தகவல்கள் தெரிவிக்கிறது.
நெல்சனை ஊக்குவித்த நடிகர் விஜய்
அதனை தொடர்ந்து ஆந்திரா, தெலுங்கானா பகுதிகளில் ரூ.12.04 கோடியும், கர்நாடகாவில் ரூ.11.92 கோடியும், கேரளாவில் ரூ.5.38 கோடி மற்றும் வெளிநாடுகளில் ரூ.32.75 கோடி என மொத்தம் உலகம் முழுவதும் ரூ.95.78 கோடி வசூல் செய்துள்ளது என்றும் கூறப்படுகிறது. இந்நிலையில், இப்படத்தின் இயக்குனரான நெல்சனை நடிகர் விஜய் தொலைபேசி மூலம் தொடர்பு கொண்டு தனது வாழ்த்துக்களை தெரிவித்துள்ளார் என்று செய்திகள் வெளியாகியுள்ளது. 'பீஸ்ட்' படத்தின் பொழுது நடிகர் விஜய் தான் நெல்சனை, "ரஜினியிடம் போய் கதை கூறுங்கள், அவர் நிச்சயம் ஒப்புக்கொள்வார். உங்களுக்கும் அது ஒரு நல்ல வாய்ப்பாக அமையும்" என்று ஊக்கப்படுத்தியதாக நெல்சன் முன்னதாக கூறியது குறிப்பிடத்தக்கது.
