மாணவர்களே அலர்ட்; மாதம் ரூ.20,000 உதவித்தொகை; ஆர்பிஐ சம்மர் இன்டர்ன்ஷிப்புக்கு உடனே விண்ணப்பிங்க
செய்தி முன்னோட்டம்
இந்தியாவின் மத்திய வங்கியான ரிசர்வ் வங்கி (ஆர்பிஐ), 2026 ஆம் ஆண்டுக்கான மதிப்புமிக்க கோடைகாலப் இன்டர்ன்ஷிப் பயிற்சித் திட்டத்திற்கு விண்ணப்பங்களை வரவேற்கிறது. ரிசர்வ் வங்கியின் பொருளாதாரம், நிதி, ஒழுங்குமுறை மற்றும் கொள்கை ஆராய்ச்சிச் சூழலில் நேரடியாக அனுபவத்தைப் பெற இந்தத் திட்டம் அரிய வாய்ப்பை வழங்குகிறது. விண்ணப்பிக்கக் கடைசி நாள் டிசம்பர் 15 ஆகும். தேர்வு செய்யப்படுபவர்கள் 2026 ஆம் ஆண்டின் ஏப்ரல் மற்றும் ஜூலை மாதங்களுக்கு இடையில் அதிகபட்சமாக மூன்று மாதங்கள் வரை இந்தப் பயிற்சி நடைபெறும். திட்டத்தின் தேவைகள் மற்றும் துறைசார்ந்த அடிப்படையில் காலம் மாறுபடலாம். விண்ணப்பதாரர்கள் விண்ணப்பத்தின் அடிப்படையில் முதற்கட்டமாக தேர்வு செய்யப்பட்டு நேர்காணல்கள் ஜனவரி-பிப்ரவரி மாதங்களில் நடைபெறும், இறுதியான தேர்வு மார்ச் மாதத்திற்குள் அறிவிக்கப்படும்.
தகுதி
தகுதி மற்றும் தேர்வு செயல்முறை
அங்கீகரிக்கப்பட்ட இந்தியப் பல்கலைக்கழகங்கள் அல்லது கல்வி நிறுவனங்களில் முதுகலைப் பட்டப் படிப்பு, ஒருங்கிணைந்த ஐந்தாண்டுப் படிப்புகள் அல்லது தொழில்முறை இளங்கலைப் படிப்புகளின் முந்தைய ஆண்டில் படிக்கும் மாணவர்கள் இந்தப் பயிற்சிக்கு விண்ணப்பிக்கலாம். பொருளாதாரம், நிதி, மேலாண்மை, புள்ளியியல், வணிகவியல், வங்கி, பொருளாதார அளவியல், சட்டம் மற்றும் அது தொடர்புடைய துறைகளைப் படிக்கும் கல்லூரி மாணவர்கள் தகுதியுடையவர்கள். பொதுவாக, ஆண்டுதோறும் சுமார் 125 பயிற்சியாளர்கள் வரை விண்ணப்ப மதிப்பாய்வு மற்றும் நேர்காணல் மூலம் தேர்ந்தெடுக்கப்படுகின்றனர்.
பலன்கள்
பயன்பாடு மற்றும் பலன்கள்
தேர்ந்தெடுக்கப்படும் பயிற்சியாளர்களுக்கு மாதந்தோறும் ரூ.20,000 உதவித்தொகையாக வழங்கப்படும். ரிசர்வ் வங்கி தங்குமிடத்தை வழங்காத போதும், வெளி மாவட்டங்களிலிருந்து வரும் பயிற்சியாளர்களுக்கு, நியமிக்கப்பட்ட பயிற்சி இடத்திற்கு இரண்டாம் வகுப்பு ஏசி ரயில் கட்டணம் திரும்பப் பெறப்படும். தேர்ந்தெடுக்கப்பட்டவர்கள், வங்கி ஒழுங்குமுறை, நாணயக் கொள்கை, நிதி நிலைத்தன்மை, தரவு பகுப்பாய்வு மற்றும் பொருளாதார ஆய்வுகள் போன்ற துறைகளில் நிஜ நேரத் திட்டங்களில் பங்களித்து மதிப்புமிக்க அனுபவத்தைப் பெறுவார்கள்.
விண்ணப்பம்
விண்ணப்பிக்கும் முறை
தகுதியுடைய மற்றும் ஆர்வமுள்ள விண்ணப்பதாரர்கள், ஆர்பிஐயின் அதிகாரப்பூர்வ பயிற்சி போர்ட்டலுக்கு (opportunities.rbi.org.in) சென்று, 'Summer Internship' என்ற விருப்பத்தைத் தேர்ந்தெடுத்து, ஆன்லைன் படிவத்தைப் பூர்த்தி செய்து, தேவையான ஆவணங்களுடன் (புகைப்படம், கையொப்பம், செல்லுபடியாகும் ஐடி, கல்வி நிறுவனத்தின் சான்றிதழ் மற்றும் நோக்க அறிக்கை) சமர்ப்பிக்க வேண்டும். விண்ணப்பதாரர்கள் பொதுவாகத் தாங்கள் படிக்கும் மாநிலத்துடன் இணைக்கப்பட்ட ஒரு கட்டுப்பாட்டு அலுவலகத்தில் பயிற்சிக்கு விண்ணப்பிக்க வேண்டும்.