வருடத்திற்கு 2 மாத சம்பளம், 10 மாத விடுப்பு: Meta நிறுவனம் கொண்டுவரும் புதிய விருப்ப ஓய்வுத் திட்டம்
செய்தி முன்னோட்டம்
மைக்ரோசாஃப்ட் மற்றும் கூகுள் நிறுவனங்களை தொடர்ந்து தற்போது சமூக வலைதளப் பெருநிறுவனமான மெட்டா நிறுவனமும் தனது ஊழியர்களுக்கு விருப்ப ஓய்வு வழங்கும் திட்டத்தை அறிமுகப்படுத்தியுள்ளதாக தகவல்கள் வெளியாகியுள்ளன. செயற்கை நுண்ணறிவு (AI) துறையில் தனது முதலீடுகளை பெரிய அளவில் அதிகரித்து வரும் மார்க் ஜூக்கர்பெர்க் தலைமையிலான மெட்டா, செலவினங்களைக் குறைக்கும் நடவடிக்கைகளில் தீவிரமாக இறங்கியுள்ளது. பிரெஞ்சு வெளியீடான 'La Lettre' வெளியிட்டுள்ள அறிக்கையின்படி, மெட்டா நிறுவனம் பிரான்ஸ் நாட்டில் உள்ள தனது ஊழியர்களுக்கு விருப்ப ஓய்வு திட்டத்தை அறிவித்துள்ளது. பிரான்ஸில் மெட்டாவின் கீழ் சுமார் 300 ஊழியர்கள் பணிபுரியும் நிலையில், இத்திட்டத்தால் ஏறத்தாழ 100 பேர் வரை வெளியேற வாய்ப்புள்ளதாகத் தெரிகிறது.
RCC முறை
பிரான்ஸ் நாட்டில் மெட்டாவின் புதிய எக்சிட் திட்டம்
மைக்ரோசாஃப்ட் அல்லது கூகுள் போல் ஊழியர்கள் தனிப்பட்ட முறையில் இம்முடிவை எடுப்பதற்கு மாறாக, பிரெஞ்சு தொழிலாளர் சட்ட விதிகளின்படி தொழிற்சங்கங்களுடன் பேச்சுவார்த்தை நடத்தி அமல்படுத்தப்படும் RCC (Rupture Conventionnelle Collective) கூட்டு ஒப்பந்த முறையில் இது நடைமுறைப்படுத்தப்படுகிறது.
இத்திட்டத்தின் கீழ் விருப்பத்துடன் வெளியேற விரும்புவோர் தங்களது விண்ணப்பங்களைச் சமர்ப்பிக்க நவம்பர் 5-ஆம் தேதி கடைசி நாளாக நிர்ணயிக்கப்பட்டிருந்தது.
உலகளவில் சுமார் 66,000 ஊழியர்களைக் கொண்டுள்ள மெட்டா, இத்திட்டத்தை மற்ற நாடுகளுக்கும் விரிவுபடுத்துமா என்பது இன்னும் உறுதியாகத் தெரியவில்லை.
எக்சிட் பேக்கேஜ்
மெட்டாவின் கவர்ச்சிகரமான செவரன்ஸ் பேக்கேஜ்
இதுவரை தொழில்நுட்ப நிறுவனங்கள் வழங்கியதிலேயே மிகவும் தாராளமான எக்சிட் பேக்கேஜ்களில் ஒன்றாக மெட்டாவின் இத்திட்டம் பார்க்கப்படுகிறது.
பணியில் இருந்த ஒவ்வொரு ஆண்டிற்கும் 2.15 மாதச் சம்பளம் இழப்பீடாக வழங்கப்படுகிறது.
ஊழியர்களுக்கு 10 மாதங்கள் வரை மொபிலிட்டி லீவ் வழங்கப்படுவதுடன், அப்பெறுமான காலத்தில் அவர்களின் மொத்தச் சம்பளத்தில் 80% தொகையும் வழங்கப்படுகிறது.
ஊழியர்கள் தங்களது தொழில்முறை மறுபயிற்சிக்கு தேவையான உதவிகள் அல்லது புதிய வணிகத்தைத் தொடங்க தேவையான ஆலோசனைகளையும் மெட்டா வழங்குகிறது.
மறுசீரமைப்பு
AI முதலீடுகளும் நிறுவன மறுசீரமைப்பும்
தொழில்நுட்ப உலகில் பெரிய நிறுவனங்கள் தங்களது பணியாளர் கட்டமைப்பை AI தொழில்நுட்பத்திற்கு ஏற்ப மாற்றியமைத்து வருவது குறிப்பிடத்தக்கது.
கடந்த ஏப்ரல் மாதம் உலகளாவிய பணியாளர்களில் 10% (சுமார் 8,000 பதவிகள்) குறைக்கப்படும் என மெட்டா அறிவித்தது.
மே மாதத்தில் 7,000 ஊழியர்கள் AI பணிகளுக்கு மாற்றப்பட்டனர்.
பெரிய அணிகள் தேவைப்பட்ட பல திட்டங்களை இப்போது ஒரே நபரால் செய்ய முடிகிறது என மார்க் ஜூக்கர்பெர்க் குறிப்பிட்டிருந்தார்.
டிஜிட்டல் உள்கட்டமைப்பு மற்றும் டேட்டா சென்டர்களுக்காக 2026-ஆம் ஆண்டில் மட்டும் $135 பில்லியன் முதல் $145 பில்லியன் வரை மூலதனச் செலவை மெட்டா திட்டமிட்டுள்ளது.
மேலும், 'Muse' போன்ற தனிப்பட்ட AI ஏஜெண்டுகளிலும் நிறுவனம் தீவிரமாக கவனம் செலுத்தி வருகிறது.