₹4.4 லட்சம் கோடி திரட்டி இந்திய மூலதன சந்தையில் புதிய சாதனை படைத்த எல்ஜி எலெக்ட்ரானிக்ஸ் ஐபிஓ
செய்தி முன்னோட்டம்
எல்ஜி எலெக்ட்ரானிக்ஸ் இந்தியா நிறுவனம் தனது ஆரம்பப் பொதுப் பங்களிப்பு (ஐபிஓ) மூலம், ₹4 லட்சம் கோடி என்ற ஒட்டுமொத்தப் பங்களிப்பு மதிப்பைத் தாண்டி, இந்திய மூலதனச் சந்தையில் ஒரு புதிய சாதனையைப் படைத்துள்ளது. இந்த ஐபிஓவில் முதலீட்டாளர்கள் சுமார் ₹4.4 லட்சம் கோடிக்கு ஏலம் எடுத்தனர். மொத்தம் 7.13 கோடிப் பங்குகள் விற்பனைக்குக் கொண்டுவரப்பட்ட நிலையில், 385 கோடிக்கும் அதிகமான பங்குகளுக்கு விண்ணப்பங்கள் பெறப்பட்டன. இது ஒட்டுமொத்தமாக 54.02 மடங்கு பங்களிப்பைக் குறிக்கிறது. நிறுவனத்தின் தாய் நிறுவனமான எல்ஜி எலெக்ட்ரானிக்ஸ் இன்க் ₹813.07 கோடி திரட்டும் நோக்குடன் 10.2 கோடிப் பங்குகளை விற்பனைக்கு வைத்திருந்தது. ஒரு பங்கின் விலை ₹1,080 முதல் ₹1,140 என நிர்ணயிக்கப்பட்டிருந்தது.
முதலீட்டாளர்கள்
பிரமிக்க வைத்த முதலீட்டாளர் பங்களிப்பு
முதலீட்டாளர் பிரிவுகளின் பங்களிப்பு பிரமிக்க வைக்கிறது. தகுதிவாய்ந்த நிறுவன முதலீட்டாளர்கள் 166.51 மடங்கும், நிறுவனமல்லாத முதலீட்டாளர்கள் 22.44 மடங்கும், சில்லறை முதலீட்டாளர்கள் 3.54 மடங்கும் பங்குகளை வாங்க ஆர்வம் காட்டினர். வெளியீடு விலையை விட, பங்குகள் அதிக விலையில் பட்டியலிடப்படும் என்ற கிரே மார்க்கெட் பிரீமியம் (GMP) கூர்மையாக உயர்ந்து ₹421ஐ எட்டியுள்ளது. இதன் அடிப்படையில், பங்குகள் சுமார் ₹1,561 விலையில் பட்டியலிடப்படலாம் என மதிப்பிடப்பட்டுள்ளது. இது வெளியீட்டு விலையை விட கிட்டத்தட்ட 37 சதவீதம் அதிகமாகும். நுகர்வோர் எலெக்ட்ரானிக்ஸ் துறையில் ஆதிக்கம் செலுத்தும் நிறுவனமான எல்ஜி எலெக்ட்ரானிக்ஸ் இந்தியா, 2024 நிதியாண்டில் ₹1,511 கோடி இலாபம் ஈட்டியுள்ளது.