சந்தை எதிர்பார்ப்பை பூர்த்தி செய்த கோடக் மஹிந்திரா வங்கியின் காலாண்டு முடிவுகள்
செய்தி முன்னோட்டம்
2023-24 நிதியாண்டில், ஜூன் 30ல் முடிவடைந்த முதல் காலாண்டு முடிவுகளை வெளியிட்டிருக்கிறது இந்தியாவின் தனியார் கடன் வழங்கும் வங்கிகளில் ஒன்றான கோடக் மஹிந்திரா வங்கி.
சந்தை வல்லுனர்களின் கணிப்பைப் பூர்த்தி செய்தது மட்டுமல்லாமல், அதனைக் கடந்து நல்ல காலாண்டு முடிவுகளையே பதிவு செய்திருக்கிறது கோடக் மஹிந்திரா வங்கி.
இந்த காலாண்டு முடிவுகளை வெளியிடுவதற்கு மும்பையில் நடைபெற்ற அவ்வங்கியின் இயக்குநர் குழுக் கூட்டத்தில் ஒப்புதல் அளிக்கப்பட்டதையடுத்து, நேற்று தங்கள் காலாண்டு முடிவுகளை அதிகாரப்பூர்வமாக வெளியிட்டிருக்கிறது கோடக் மஹிந்திரா வங்கி.
கடந்த நிதியாண்டு முதல் காலாண்டில், ரூ.2071 கோடி நிகர லாபத்தை அந்நிறுவனம் பதிவு செய்திருந்த நிலையில், இந்த நிதியாண்டின் முதல் காலாண்டில் 67% அதிகமாக, ரூ.3,452 கோடி நிகர லாபத்தைப் பதிவு செய்திருக்கிறது அவ்வங்கி.
வணிகம்
கோடக் மஹிந்திரா வங்கி: காலாண்டு முடிவுகள்
அவ்வங்கியின் நிகர வட்டி வருவாயானது, கடந்த நிதியாண்டு முதல் காலாண்டுடன் ஒப்பிடும் போது 33% அதிகரித்து, ரூ.6,234 கோடியாக பதிவு செய்திருக்கிறது. முதல் காலாண்டின் நிகர வட்டி வரம்பானது 5.57% எனக் குறிப்பிட்டிருக்கிறது கோடக் மஹிந்திரா.
சராசரி நடப்புக் கணக்கு வைப்புத் தொகையானது, கடந்த நிதியாண்டுடன் ஒப்பிடும் போது 8% அதிகரித்து ரூ.59,431 கோடியாக அதிகரித்திருக்கிறது.
அதேபோல், சராசரி சேமிப்புக் கணக்கு வைப்புத் தொகையானது, ஜூன் 30 வரை ரூ.1,19,817 கோடியாக இருப்பதாகக் குறிப்பிட்டிருக்கிறது கோடக் மஹிந்திரா வங்கி.
மேலும், அவ்வங்கியின் செயல்பாட்டு வருவாயாது கடந்தாண்டுடன் ஒப்பிடும் போது 78% அதிகரித்து ரூ.4,950 கோடியாக உயர்ந்திருப்பதாகக் குறிப்பிடப்பட்டிருக்கிறது.