7வது ஆண்டு விழாக் கொண்டாட்டம், ரீசார்ஜ் திட்டங்களில் சலுகைகளை வழங்கும் ஜியோ
இந்தியாவில் தொடங்கப்பட்டு இன்றுடன் 7 ஆண்டுகளை நிறைவு செய்கிறது ரிலையன்ஸ் ஜியோ. தங்களுடை 7வது ஆண்டு விழாவை முன்னிட்டு குறிப்பிட்ட ரீசார்ஜ் திட்டங்களில் மட்டும் சில சலுகைகளை வழங்கியிருக்கிறது அந்நிறுவனம். தினமும் 2 GB மொபைல் டேட்டா, 100 இலவச SMSகளை மற்றும் வரம்பில்லா அழைப்புகளை வழங்கும், 28 நாட்கள் வேலிடிட்டி கொண்ட ரூ.299 ரீசார்ஜ் திட்டத்தைப் பெறுபவர்களுக்கு 7 GB மொபைல் டேட்டா கொண்ட வவுச்சர் ஒன்றை இலவசமாக வழங்குகிறது ஜியோ. அதேபோல், மேலும் இரண்டு திட்டங்களிலும் இதேபோல இலவச வவுச்சர்களை வழங்குகிறது அந்நிறுவனம். ஆனால், இந்த சலுகையானது, இன்று முதல் செப்டம்பர் 30 தேதி வரை ரீசார்ஜ் செய்வர்களுக்கே பொருந்தும் எனவும் அறிவித்திருக்கிறது ஜியோ நிறுவனம்.
ஜியோவின் பிற சலுகை வழங்கும் ரீசார்ஜ் திட்டங்கள்:
தினமும் 2 GB மொபைல் டேட்டா, 100 இலவச SMSகளை மற்றும் வரம்பில்லா அழைப்புகளை வழங்கும், 90 நாட்கள் வேலிடிட்டி கொண்ட ரூ.749 திட்டத்திற்கு ரீசார்ஜ் செய்பவர்களுக்கு, இரண்டு 7 GB மொபைல் டேட்டா வவுச்சர்களை இலவசமாக வழங்குகிறது ஜியோ. அதேபோல் வருடாந்திர திட்டங்களில், தினமும் 2.5 GB டேட்டா, 100 SMS மற்றும் வரம்பில்லா அழைப்புகளை வழங்கும், 365 நாட்கள் வேலிடிட்டி கொண்ட ரூ.2,999 திட்டத்திற்கு ரீசார்ஜ் செய்பவர்களுக்கு, மூன்று 7 GB டேட்டா வவுச்சர்கள் வழங்குகிறது ஜியோ. இத்துடன் இந்தத் திட்டதிற்கு, தற்போது நெட்மெட்ஸ், ஸ்விக்கி, ரிலையன்ஸ் டிஜிட்டல், யான்த்ரா.காம் மற்றும் விமான டிக்கெட்டிகளில் பயன்படுத்தும் வகையிலான சலுகைக் கூப்பன்களையும் வழங்குகிறது அந்நிறுவனம்.
