டெஸ்லாவின் புதிய CFO-வாக நியமிக்கப்பட்ட இந்திய வம்சாவளியைச் சேர்ந்த வைபவ் தானேஜா
செய்தி முன்னோட்டம்
டெஸ்லாவின் தலைமை நிதி அதிகாரியாக (CFO) செயல்பட்டு வந்த ஸாக்ரி கிர்க்ஹார்ன், அந்தப் பதவியில் இருந்து விலகுவதாக அறிவித்திருக்கிறது அந்நிறுவனம். 2010-ம் ஆண்டு முதல் டெஸ்லாவில் பணியாற்றி வரும் ஸாக்ரி கிர்க்ஹார்ன், மார்ச் 2019-ல் அந்நிறுவனத்தின் தலைமை நிதி அதிகாரியாக நியமிக்கப்பட்டார்.
அவரது பதவி விலகலைத் தொடர்ந்து, இந்திய வம்சாவளியைச் சேர்ந்த வைபவ் தானேஜா, புதிய தலைமை நிதி அதிகாரியாக நியமிக்கப்பட்டிருக்கிறார். இவர் முன்னதாக அதே நிறுவனத்தின் தலைமை கணக்கியல் அதிகாரியாக செயல்பட்டு வந்திருக்கிறார்.
இனி, மேற்கூறிய இரண்டு பிரிவுகளின் தலைமை அதிகாரியாகவும் வைபவ் தானேஜாவே செயல்படுவார் எனத் தெரிவிக்கப்பட்டுள்ளது. இந்த பரிமாற்றத்தை மேற்கொள்ள இந்த ஆண்டு டெஸ்லாவுடனே கிர்க்ஹார்ன் பயணிப்பார் எனத் தெரிவிக்கப்பட்டுள்ளது.
டெஸ்லா
புதிய CFO-வான வைபவ் தானேஜா:
தற்போது டெஸ்லாவின் தலைமை நிதி அதிகாரியாக கூடுதல் பொறுப்புகள் கொடுக்கப்பட்டிருக்கும் வைபவ் தானேஜா, மார்ச் 2019 முதல் அந்நிறுவனத்தின் தலைமை கணக்கியல் அதிகாரியாகச் செயல்பட்டு வருகிறார்.
முன்னதாக, பிப்ரவரி 2017 முதல் துணை கார்ப்பரேட் கண்ட்ரோலராகவும், மே 2018 முதல் டெஸ்லாவின் கார்ப்பரேட் கண்ட்ரோலராகவும் செயல்பட்டு வந்திருக்கிறார்.
அதற்கு முன்பு, மார்ச் 2016 முதல் சோலார்சிட்டி கார்ப்பரேஷன் நிறுவனத்தில் கார்ப்பரேட் கண்ட்ரோலராக பணியாற்றியிருக்கிறார். இந்த நிறுவனத்தை 2016-ல் கையகப்படுத்தியது டெஸ்லா.
தொடக்கத்தில், 1999 முதல் 2016 வரை அமெரிக்காவைச் சேர்ந்த பிரைஸ் வாட்டர் ஹவுஸ் கூப்பர் என்ற நிதிச் சேவைகளை வழங்கும் நிறுவனத்தில் பணியாற்றியிருக்கிறார் வைபவ் தானேஜா.