சீனாவை பின்னுக்குத் தள்ளியது இந்தியா; உலக அரிசி ராஜாவாக மகுடம் சூடி சாதனை
செய்தி முன்னோட்டம்
உலகிலேயே அதிக அளவு அரிசி உற்பத்தி செய்யும் நாடாக இந்தியா உருவெடுத்துள்ளது. நீண்ட காலமாக முதலிடத்தில் இருந்த சீனாவை பின்னுக்குத் தள்ளி, இந்தியா இந்தச் சாதனையைப் படைத்துள்ளதாக மத்திய வேளாண்மைத் துறை அமைச்சர் சிவராஜ் சிங் சவுகான் தெரிவித்துள்ளார். ஜனவரி 4, 2026 அன்று டெல்லியில் நடைபெற்ற நிகழ்ச்சியில் வெளியிடப்பட்ட தரவுகளின்படி இந்தியாவின் உற்பத்தி 150.18 மில்லியன் டன் ஆகும். அதே நேரத்தில் சீனாவின் உற்பத்தி 145.28 மில்லியன் டன் மட்டுமே இருந்தது. உணவு தானியப் பற்றாக்குறையை எதிர்கொண்ட ஒரு காலத்தில் இருந்து, இன்று உலகிற்கே உணவளிக்கும் நாடாக இந்தியா மாறியுள்ளது. நாட்டின் மொத்த உணவு தானிய இருப்பும் தற்போது திருப்திகரமான அளவில் உள்ளது.
வெற்றிக்கான காரணிகள்
இந்தியாவின் வளர்ச்சிக்கான முக்கிய காரணிகள்
இந்திய வேளாண் ஆராய்ச்சி நிறுவனம் உருவாக்கிய அதிக விளைச்சல் தரும் 184 புதிய பயிர் ரகங்கள் அறிமுகப்படுத்தப்பட்டுள்ளன. இவை சீதோஷ்ண மாற்றங்களைத் தாங்கி வளரக்கூடியவை. கடந்த 10 ஆண்டுகளில் மட்டும் 3,236 உயர்தரப் பயிர் ரகங்களுக்கு மத்திய அரசு ஒப்புதல் அளித்துள்ளது. நவீன விவசாயத் தொழில்நுட்பங்களைப் பின்பற்றிய விவசாயிகளின் கடின உழைப்பு மற்றும் முறையான பாசன வசதிகள் இந்த உற்பத்தி உயர்வுக்கு வழிவகுத்தன. பீகார், ஒடிசா, மேற்கு வங்கம் மற்றும் அசாம் போன்ற மாநிலங்களில் நெல் சாகுபடிக்கு அளிக்கப்பட்ட ஊக்கத்தொகை மற்றும் மானியங்கள் உற்பத்தியை அதிகரிக்க உதவின. அரிசி உற்பத்தியில் முதலிடம் பிடித்திருப்பதோடு, ஏற்கனவே இந்தியாவின் ஒட்டுமொத்த விவசாய ஏற்றுமதியில் அரிசியின் பங்கு சுமார் 24% ஆக உள்ளது குறிப்பிடத்தக்கது.