புதிய வருமான வரி விதிகள் 2026: பெற்றோர் அல்லது மனைவிக்கு வாடகை கொடுத்து வரி விலக்கு பெற முடியுமா?
செய்தி முன்னோட்டம்
சம்பளம் பெறும் ஊழியர்கள் பலர் தங்களது பெற்றோர் அல்லது நெருங்கிய உறவினர்களின் வீட்டில் வசித்துக் கொண்டு, அவர்களுக்கு வாடகை செலுத்துவதன் மூலம் வீட்டு வாடகை கொடுப்பனவு வரி விலக்கைப் பெற்று வருகின்றனர். 2026-ஆம் ஆண்டுக்கான வருமான வரி வரைவு விதிகள் அறிமுகப்படுத்தப்பட்டுள்ள நிலையில், இத்தகைய நடைமுறை இனி செல்லுமா என்ற கேள்வி எழுந்துள்ளது. இதற்குப் பதில் ஆம் என்பதுதான். ஆனால், இனி இந்த நடைமுறை மிகவும் வெளிப்படையானதாகவும், கூடுதல் கட்டுப்பாடுகளுடனும் இருக்கும் என்று நிபுணர்கள் தெரிவிக்கின்றனர்.
விதிமுறை 205
புதிய விதிமுறை 205 சொல்வது என்ன?
புதிய வரைவு விதிகளின்படி, HRA வரி விலக்கு கோரும் வரி செலுத்துவோர், படிவம் எண் 124 இல் தனது வீட்டு உரிமையாளருடன் தமக்குள்ள உறவை வெளிப்படையாகத் தெரிவிக்க வேண்டும். பெற்றோர், மாமனார், மாமியார் அல்லது வாழ்க்கைத் துணையிடம் வாடகைக்கு இருப்பவர்கள், அந்தத் தகவலை இனி மறைக்க முடியாது. இந்த மாற்றம் வரி ஏய்ப்பைத் தடுப்பதற்காகவும், போலி வாடகை ரசீதுகளைக் கண்டறியவும் கொண்டு வரப்பட்டுள்ளதாக நிபுணர்கள் விளக்குகின்றனர்.
வாடகை
சட்டப்பூர்வமாக வாடகை செலுத்துவது எப்படி?
பெற்றோர் அல்லது உறவினர்களுக்கு வாடகை செலுத்தி வரி விலக்கு பெற வேண்டுமெனில், பின்வரும் நிபந்தனைகளை முறையாகப் பின்பற்ற வேண்டும்: வீட்டு உரிமையாளருக்கும் (பெற்றோர்/உறவினர்) உங்களுக்கும் இடையே முறையான வாடகை ஒப்பந்தம் இருக்க வேண்டும். வாடகைத் தொகையை ரொக்கமாக வழங்காமல், வங்கிப் பரிமாற்றம் மூலம் செலுத்துவது நம்பகத்தன்மையை அதிகரிக்கும். நீங்கள் செலுத்தும் வாடகையை, உங்களின் பெற்றோர் அல்லது உறவினர் தங்களது வருமான வரித் தாக்கல் படிவத்தில் வாடகை வருமானம் என்று காட்ட வேண்டும். அந்த வீடு உங்கள் பெற்றோர் அல்லது உறவினர் பெயரில் இருப்பதை உறுதி செய்யும் ஆவணங்கள் இருக்க வேண்டும்.
தண்டனை
தவறான தகவல் அளித்தால் என்ன தண்டனை?
போலியான வாடகை ஒப்பந்தங்களை உருவாக்கி வரி ஏய்ப்பு செய்ய முயற்சிப்பவர்களுக்குக் கடுமையான அபராதங்கள் விதிக்கப்படும் என்று வருமான வரிச் சட்டம் எச்சரிக்கிறது. வருமான வரிச் சட்டம் பிரிவு 270A இன் படி, வருமானத்தை மறைத்து வரி செலுத்துபவர்களுக்கு, செலுத்த வேண்டிய வரியில் 50 சதவீதம் முதல் 200 சதவீதம் வரை அபராதம் விதிக்கப்படலாம். எனவே, வாடகைத் தொகை சந்தை விலைக்கு ஏற்ப இருப்பதையும், அது முறையாகப் பரிமாறப்படுவதையும் உறுதி செய்வது அவசியம் என்று நிபுணர்கள் அறிவுறுத்துகின்றனர்.
வெளிப்படைத்தன்மை
வெளிப்படைத்தன்மையே பாதுகாப்பு
உண்மையிலேயே உங்கள் பெற்றோரின் வீட்டில் வசித்து, அவர்களுக்கு நீங்கள் வாடகை செலுத்துகிறீர்கள் என்றால், புதிய விதிகளால் உங்களுக்கு எந்தப் பாதிப்பும் இல்லை. படிவம் 12BA இல் சரியான உறவுமுறைத் தகவலை அளிப்பதன் மூலம், நீங்கள் தொடர்ந்து HRA சலுகையைப் பெறலாம். இந்த விதிமுறைகள் வரி நிர்வாகத்தில் நம்பகத்தன்மையை உருவாக்கவே கொண்டு வரப்பட்டுள்ளன.