ஈரான் போரினால் பாதிக்கப்படும் நாடுகளுக்கு நிதியுதவி வழங்கத் தயார் என ஐஎம்எஃப் அறிவிப்பு
செய்தி முன்னோட்டம்
ஈரான் போர் தீவிரமடைந்து வரும் நிலையில், அதன் தாக்கம் உலகப் பொருளாதாரத்தில் பெரும் அதிர்வுகளை ஏற்படுத்தத் தொடங்கியுள்ளது. இந்தச் சூழலில், போரினால் பாதிக்கப்படக்கூடிய நாடுகளைக் கண்டறிந்து, அவர்களுக்குத் தேவையான நிதி உதவிகளை வழங்க சர்வதேச நாணய நிதியம் (ஐஎம்எஃப்) தீவிரமாகத் தயாராகி வருகிறது. புவிசார் அரசியல் பதற்றங்கள் நீடித்தால், வளரும் நாடுகளின் பொருளாதாரம் நிலைகுலையக்கூடும் என்ற அச்சமே ஐஎம்எஃப்பின் இந்தத் திட்டத்திற்குக் காரணம் எனக் கூறப்படுகிறது.
பாதிப்பு
பாதிக்கப்படும் நாடுகளின் ஆய்வு
ஐஎம்எஃப் தனது உள்நாட்டுக் குழுக்களுக்கு ஒரு முக்கியப் பணியை வழங்கியுள்ளது. தற்போது ஐஎம்எஃப் நிதித் திட்டங்களின் கீழ் உள்ள நாடுகளின் பொருளாதார நிலையை விரிவாக ஆய்வு செய்யுமாறு உத்தரவிடப்பட்டுள்ளது. குறிப்பாக, அந்த நாடுகளின் அந்நியச் செலாவணி இருப்பு, வெளிநாட்டுக் கடன் மற்றும் போரினால் ஏற்படக்கூடிய நிதிப் பற்றாக்குறை ஆகியவை குறித்து விரிவான அறிக்கைகள் தயார் செய்யப்பட்டு வருகின்றன. ஏற்கனவே நிதி நெருக்கடியில் உள்ள நாடுகள், இந்தத் திடீர் போர்ச் சூழலால் மேலும் பாதிக்கப்பட வாய்ப்புள்ளதாக ப்ளூம்பெர்க் அறிக்கை தெரிவிக்கிறது.
விலை உயர்வு
கச்சா எண்ணெய் மற்றும் கமாடிட்டி விலை உயர்வு
இந்தப் போரின் நேரடிப் பாதிப்பாக சர்வதேச சந்தையில் கச்சா எண்ணெய் விலை லிட்டருக்கு 100 டாலரைத் தாண்டியுள்ளது. போர் தொடங்குவதற்கு முன்பு 70 டாலராக இருந்த விலை, இப்போது விண்ணைத் தொட்டுள்ளது. இது எண்ணெய் இறக்குமதி செய்யும் நாடுகளின் கஜானாவைப் பெருமளவில் பாதிப்பதோடு, அந்த நாடுகளில் பணவீக்கத்தையும் அதிகரிக்கச் செய்துள்ளது. இது தவிர, உரம் விநியோகத்தில் ஏற்பட்டுள்ள சிக்கல்கள் விவசாய உற்பத்தியைப் பாதிக்கும் அபாயத்தையும் உருவாக்கியுள்ளன. இது குறைந்த வருமானம் கொண்ட நாடுகளில் உணவுப் பாதுகாப்பிற்குப் பெரும் அச்சுறுத்தலாக மாறியுள்ளது.
ஐஎம்எஃப்
ஐஎம்எஃப்பின் நிதி வலிமை
ஐஎம்எஃப்பின் மேலாண்மை இயக்குநர் கிறிஸ்டலினா ஜார்ஜீவா இது குறித்துக் கூறுகையில், "உலகளாவிய நிச்சயமற்ற சூழலில் பல நாடுகள் உதவியை நாடி வருவது இயல்பானது. தற்போது சுமார் 50 நாடுகளுக்கு 166 பில்லியன் டாலர் மதிப்பிலான கடன் திட்டங்களை ஐஎம்எஃப் செயல்படுத்தி வருகிறது. இருப்பினும், எங்களிடம் சுமார் 1 டிரில்லியன் டாலர் வரை நிதி வழங்கும் திறன் உள்ளது. தேவைப்பட்டால் புதிய திட்டங்களை உருவாக்கிப் பாதிக்கப்படும் நாடுகளுக்குத் தோள் கொடுப்போம்." என்று உறுதி அளித்துள்ளார்.
கவலை
பொருளாதார வளர்ச்சி குறித்த கவலைகள்
2026 ஆம் ஆண்டிற்கான உலகப் பொருளாதார வளர்ச்சி 3.3 சதவீதமாக இருக்கும் என்று முன்னதாகக் கணிக்கப்பட்டிருந்தது. ஆனால், தற்போதைய ஈரான் போர்ச் சூழல் மற்றும் கச்சா எண்ணெய் விலை உயர்வு காரணமாக, இந்த வளர்ச்சி விகிதம் குறையக்கூடும் என அஞ்சப்படுகிறது. வரவிருக்கும் உலகப் பொருளாதார அவுட்லுக் அறிக்கையில், இந்த மாற்றங்கள் பிரதிபலிக்கும் என்று எதிர்பார்க்கப்படுகிறது. குறிப்பாக பசிபிக் தீவு நாடுகள் மற்றும் அதிகக் கடன் சுமையில் உள்ள நாடுகள் இந்தப் போரினால் அதிகம் பாதிக்கப்படக்கூடும் என ஐஎம்எஃப் எச்சரித்துள்ளது. போரின் தீவிரம் குறையாத பட்சத்தில், பல நாடுகள் ஐஎம்எஃப்-ன் கதவைத் தட்ட வேண்டிய சூழல் உருவாகும் என்பது நிதர்சனம்.