சென்னை ஃபோர்டு தொழிற்சாலையை வாங்க பேச்சுவார்த்தை நடத்தி வரும் வின்ஃபாஸ்ட்
செய்தி முன்னோட்டம்
வியட்நாமைச் சேர்ந்த எலெக்ட்ரிக் கார் தயாரிப்பாளரான் வின்ஃபாஸ்ட் (VinFast) நிறுவனம் இந்தியா ஆட்டோமொபைல் சந்தையிலும் நுழைய திட்டமிடுவதாகத் தகவல் வெளியாகியிருந்தது.
இந்நிலையில், சென்னையில் உள்ள அமெரிக்காவைச் சேர்ந்த ஃபோர்டு நிறுவனத்திற்கு சொந்தமான தயாரிப்பு தொழிற்சாலையை வாங்குவதற்கு வின்ஃபாஸ்ட் ஆர்வம் காட்டி வருவதாகவும், முதற்கட்டப் பேச்சுவார்த்தைகள் நடைபெற்று வருவதாகவும் தற்போது தகவல் வெளியாகியிருக்கின்றன.
2017ம் ஆண்டு தொடங்கப்பட்ட வின்ஃபாஸ்ட் நிறுவனம், தொடக்கத்தில் பிஎம்டபிள்யூ மற்றும் ஜெனரல் மோட்டார்ஸ் ஆகிய நிறுவனங்களுடன் கூட்டணி அமைத்து வியட்நாமில் புதிய கார்களை தயாரித்து விற்பனை செய்து வந்தது.
பின்னர் எலெக்ட்ரிக் வாகனத் தயாரிப்புக்கு மாறி, 2021ம் ஆண்டு அமெரிக்காவில் VF 8 மற்றும் VF 9 ஆகிய இரண்டு எலெக்ட்ரிக் எஸ்யூவிக்களை அறிமுகப்படுத்தியிருக்கிறது அந்நிறுவனம்.
எலெக்ட்ரிக் கார்
இந்தியாவில் வின்ஃபாஸ்டின் திட்டம்:
அமெரிக்காவில் சராசரியான விற்பனையையே கொண்டிருக்கும் போதிலும், தற்போது அந்நாட்டில் புதிய எலெக்ட்ரிக் கார் தொழிற்சாலை ஒன்றை கட்டமைத்து வருகிறது வின்ஃபாஸ்ட்.
அமெரிக்காவைத் தொடர்ந்து, இந்தியா மற்றும் இந்தோனேஷியா ஆகிய நாடுகளிலும் எலெக்ட்ரிக் கார் விற்பனையைத் தொடங்க திட்டமிட்டு வருகிறது அந்நிறுவனம்.
இந்தியாவில் அதன் ஒரு பகுதியாகவே ஃபோர்டு தொழிற்சாலையை வாங்குவதற்கான பேச்சுவார்த்தையில் ஈடுபட்டிருக்கிறது. மேலும், அடுத்த ஆண்டே இந்தியாவில் செயல்பாடுகளைத் தொடங்க நிறுவனத்திற்கான ஆட்சேர்ப்பு நடவடிக்கையிலும் ஈடுபட்டிருக்கிறது அந்நிறுவனம்.
தொடக்கத்தில் முழுவதுமாக கட்டமைக்கப்பட்டும், பின்னர் இந்தியாவில் அசெம்பிள் செய்தும் எலெக்ட்ரிக் கார்களை விற்பனை செய்யத் திட்டமிட்டிருக்கிறது வின்ஃபாஸ்ட். இந்தியாவில் விற்பனையை பொருத்து, உள்நாட்டிலேயே பாகங்களை தயாரிக்கும் திட்டத்தையும் பரிசீலனையில் வைத்திருக்கிறது வின்ஃபாஸ்ட்.