ரெய்டர் 125 பைக்கின் சூப்பர் ஸ்குவாடு ஸ்பெஷல் எடிஷன் மாடல்களை அறிமுகப்படுத்திய டிவிஎஸ்
செய்தி முன்னோட்டம்
இந்தியாவில் டிவிஎஸ் நிறுவனம் விற்பனை செய்து வரும் 125சிசி பைக்கான ரெய்டரின் சூப்பர் ஸ்குவாடு எடிஷனை வெளியிட்டிருக்கிறது. இந்தப் புதிய ஸ்பெஷல் எடிஷனின் கீழ் இரண்டு புதிய நிறங்களில் ரெய்டர் 125-ஐ வெளியிட்டிருக்கிறது டிவிஎஸ்.
முன்னதாக, தங்களுடைய என்டார்க் 125 ஸ்கூட்டரின் ஸ்பெஷல் எடிஷன் பலவற்றை வெளியிட்டிருக்கிறது டிவிஎஸ். அதனைத் தொடர்ந்து, தற்போது ரெய்டர் 125 மாடலுக்கும் வெளியிட்டிருக்கிறது.
இந்த ஸ்பெஷல் எடிஷன் மாடல்களை, அமெரிக்காவைச் சேர்ந்த மார்வெல் நிறுவனத்தின் இரண்டு சூப்பர்ஹீரோக்களான ஐயர்ன் மேன் மற்றும் பிளாக் பேந்தர் ஆகிய கதாபாத்திரங்களை அடிப்படையாகக் கொண்டு வெளியிட்டிருக்கிறது டிவிஎஸ்.
புதிய நிற மாற்றத்தைத் தவிர்த்து, வேறு எந்த வசதிகளோ அல்லது மாற்றங்களோ புதிய ரெய்டர் 125-ல் கொடுக்கப்படவில்லை அல்லது செய்யப்படவில்லை என்பது குறிப்பிடத்தக்கது.
டிவிஎஸ்
டிவிஎஸ் ரெய்டர் 125: சூப்பர் ஸ்குவாடு எடிஷன்
ஐயர்ன் மேன் கதாப்பாத்திரத்தை அடிப்படையாகக் கொண்ட மாடலில், கருப்பு மற்றும் சிவப்பு நிறங்களுடன், ஐயர்ன் மேன் போன்ற அடையாளத்தையும் பைக்கின் பெட்ரோல் டேங்க் மீது கொடுத்திருக்கிறது டிவிஎஸ்.
அதே போல், பிளாக் பேந்தர் கதாப்பாத்திரத்தை அடிப்படையாகக் கொண்ட ரெய்டர் மாடலில், கருப்பு மற்றும் ஊதா நிறங்களுடன், பிளாக் பேந்தரின் அடையாளத்தை பைக்கின் பெட்ரோல் டேங்க் மீது கொடுத்திருக்கிறது அந்நிறுவனம்.
இந்த ஸ்பெஷல் எடிஷன் மாடல்களிலும், எல்இடி முகப்பு விளக்குகள், எல்இடி DRL, சிங்கிள் சேனல் ABS, LCD டிஸ்பிளே ஆகிய வசதிகள் கொடுக்கப்பட்டிருக்கின்றன.
இந்தியாவில் இந்த சூப்பர் ஸ்குவாடு ஸ்பெஷல் எடிஷன் மாடல்களை, ரூ.98,919 எக்ஸ்-ஷோரூம் விலையில் வெளியிட்டிருக்கிறது டிவிஎஸ் நிறுவனம்.