பஜாஜூடன் கூட்டணி அமைத்து இந்தியாவில் புதிய பைக் மாடல்களை அறிமுகப்படுத்தியது ட்ரையம்ப்
செய்தி முன்னோட்டம்
இந்தியாவில் பஜாஜ் நிறுவனத்துடன் கூட்டணி அமைத்து புதிய பைக் மாடல்களை வெளியிடத் திட்டமிட்டு வந்தது ட்ரையம்ப் நிறுவனம். தற்போது, இந்தக் கூட்டணியின் கீழ் இரண்டு புதிய பைக்குகளை அந்நிறுவனம் இந்தியாவில் அறிமுகப்படுத்தியிருக்கிறது.
தற்போது ஸ்பீடு 400 மற்றும் ஸ்கிராம்ப்லர் 400 X ஆகிய இரண்டு பைக் மாடல்களை இந்தியாவில் அறிமுகப்படுத்தியிருக்கிறது ட்ரையம்ப்.
தங்களுடைய ப்ரீமியம் பைக் மாடல்களான 'ஸ்பீடு ட்வின் 900' மாடலை அடிப்படையாகக் கொண்டு ஸ்பீடு 400 மாடலையும், 'ஸ்கிராம்ப்லர் 900' மாடலை அடிப்படையாகக் கொண்டு ஸ்கிராம்ப்லர் 400 X மாடலையும் வடிவமைத்திருக்கிறது ட்ரையம்ப்.
இந்த பைக்குகளின் டிசைன் மற்றும் வடிவமைப்பை ட்ரையம்ப் மேற்கொண்டிருக்கும் நிலையில், இந்தியாவில் அதன் தயாரிப்பு மற்றும் விற்பனையை மேற்கொள்ளவிருக்கிறது பஜாஜ்.
ட்ரையம்ப்
இன்ஜின் மற்றும் பிற வசதிகள்:
இந்தியாவில் தற்போது அறிமுகப்படுத்தியிருக்கும் இந்த பைக்குகளில் பயன்படுத்துவதற்காகவே புதிய இன்ஜின் ஒன்றை உருவாக்கியிருக்கிறது ட்ரையம்ப்.
40hp பவர் மற்றும் 37.5Nm டார்க்கை வெளிப்படுத்தக்கூடிய, சிங்கிள் சிலிண்டர் கொண்ட 398சிசி TR-சீரிஸ் இன்ஜினை இந்த பைக்குகளில் பயன்படுத்தியிருக்கிறது அந்நிறுவனம். மேலும், இந்த இன்ஜினுடன் 6-ஸ்பீடு கியர்பாக்ஸையும் அந்நிறுவனம் கொடுத்திருக்கிறது.
வரும் ஜூலை 5-ம் தேதி இந்த இரண்டு பைக்குகளையும் இந்தியாவில் வெளியிடத் திட்டமிட்டிருக்கிறது ட்ரையம்ப். இதன் விலை குறித்த அறிவிப்புகளையும் அன்றைய தேதியிலேயே அந்நிறுவனம் வெளியிடலாம் என எதிர்பார்க்கப்படுகிறது.
ரூ.3 லட்சம் அல்லது அதனையொட்டிய விலையில் ஸ்பீடு 400 மாடலையும், அதனை விட கொஞ்சம் கூடுதலான விலையில் ஸ்கிராம்ப்லர் 400 X மாடலையும் ட்ரையம்ப் நிறுவனம் வெளியிடலாம் என எதிர்பார்க்கப்படுகிறது.