இந்தியாவில் மெகா பிளான் போடும் டொயோட்டா! 3 புதிய தொழிற்சாலைகள் மூலம் 10 லட்சம் கார் உற்பத்தி
செய்தி முன்னோட்டம்
ஜப்பானின் முன்னணி வாகனத் தயாரிப்பு நிறுவனமான டொயோட்டா மோட்டார், இந்தியாவில் தனது உற்பத்தித் திறனை மூன்று மடங்காக அதிகரிக்கத் திட்டமிட்டுள்ளது. இதற்காக மகாராஷ்டிராவில் மூன்று புதிய வாகன அசெம்பிளி ஆலைகளை உருவாக்க நிறுவனம் முடிவு செய்துள்ளதாகத் தகவல்கள் தெரிவிக்கின்றன. இந்த விரிவாக்கத்தின் மூலம், 2030-ஆம் ஆண்டிற்குள் இந்தியாவின் ஆண்டு உற்பத்தித் திறனை 10 லட்சம் யூனிட்டுகளாக உயர்த்த டொயோட்டா இலக்கு வைத்துள்ளது. இதற்காக சுமார் 300 பில்லியன் யென் (சுமார் 1.9 பில்லியன் டாலர்) முதலீடு செய்யப்படும் என மதிப்பிடப்பட்டுள்ளது.
காலக்கெடு
ஏற்றுமதி மையமாக மாறும் இந்தியா மற்றும் காலக்கெடு விவரம்
இந்தத் திட்டத்தின் கீழ் முதல் ஆலை 2029 ஆம் ஆண்டு வாக்கில் செயல்பாட்டிற்கு வரும் என்றும், மற்ற இரண்டு ஆலைகள் 2030களின் தொடக்கத்தில் தொடங்கப்படும் என்றும் எதிர்பார்க்கப்படுகிறது. புதிய ஆலைகள் செயல்பாட்டிற்கு வரும்போது, டொயோட்டாவின் மொத்த உற்பத்தி ஆலைகளின் எண்ணிக்கை ஆறாக உயரும். குறிப்பாக, இந்த ஆலைகள் இந்தியத் தேவையை மட்டும் பூர்த்தி செய்யாமல், மேற்கு ஆசியா மற்றும் ஆப்பிரிக்க சந்தைகளுக்கான முக்கிய ஏற்றுமதி மையங்களாகவும் (Export Hubs) செயல்படும். மும்பை போன்ற முக்கியத் துறைமுகங்களுக்கு அருகில் மகாராஷ்டிரா அமைந்திருப்பது ஏற்றுமதிக்கு பெரும் வசதியாக அமையும்.
சந்தை வளர்ச்சி
உலகளாவிய உற்பத்தித் தளம் மற்றும் சந்தை வளர்ச்சி
இந்த விரிவாக்கத்தின் மூலம், ஜப்பான், சீனா மற்றும் அமெரிக்காவிற்கு அடுத்தபடியாக டொயோட்டாவின் நான்காவது பெரிய உற்பத்தித் தளமாக இந்தியா உருவெடுக்கும். 2030 ஆம் ஆண்டிற்குள் இந்தியாவின் ஆண்டு வாகன விற்பனை 6.44 மில்லியன் யூனிட்டுகளை எட்டும் என்று கணிக்கப்பட்டுள்ள நிலையில், டொயோட்டா இந்த அதிரடி முடிவை எடுத்துள்ளது. வளரும் நாடுகளில் சார்ஜிங் உள்கட்டமைப்பு சீராக இல்லாத நிலையில், டொயோட்டா தனது பிளக்-இன் ஹைப்ரிட் (Plug-in hybrid) வாகனங்களின் எண்ணிக்கையை அதிகரிக்கவும், எலக்ட்ரிக் வாகனத் தயாரிப்பில் சுசூகி (Suzuki) உடனான கூட்டணியை வலுப்படுத்தவும் திட்டமிட்டுள்ளது.
புதிய மாடல்
புதிய எஸ்யூவி மற்றும் சந்தைப் போட்டி
தயாரிப்பு ரீதியாக, டொயோட்டா தனது புகழ்பெற்ற 'கொரோலா' (Corolla) பிராண்டின் கீழ் புதிய மூன்று வரிசை இருக்கைகள் கொண்ட எஸ்யூவி காரை அறிமுகப்படுத்தத் திட்டமிட்டுள்ளது. இந்தியாவில் எஸ்யூவி கார்களுக்கு நிலவும் பெரும் வரவேற்பைக் கருத்தில் கொண்டு இந்த நடவடிக்கை எடுக்கப்படவுள்ளது. மாருதி சுஸூகி மற்றும் ஹூண்டாய் போன்ற நிறுவனங்கள் சந்தையில் ஆதிக்கம் செலுத்தி வரும் நிலையில், டொயோட்டாவின் இந்த பிரம்மாண்ட விரிவாக்கம் இந்தியாவில் பயணிகள் வாகனச் சந்தையில் போட்டியை மேலும் தீவிரப்படுத்தும் என்று எதிர்பார்க்கப்படுகிறது.