இந்தியாவில் புதிய 'ஸ்லாவியா மேட் எடிஷன்' மாடலை வெளியிட்டுள்ளது ஸ்கோடா
ஸ்லாவியா செடான் காரின் மேட் எடிஷன் மாடலை இந்தியாவில் வெளியிட்டிருக்கிறது ஸ்கோடா. மேட் பினிஷூடன் கூடிய கார்பின் ஸ்டீல் வெளிப்புறத்தைக் கொண்டிருக்கிறது இந்தப் புதிய மேட் எடிஷன் ஸ்லாவியா மாடல். காரின் உள்ளே 10 இன்ச் டச்ஸ்கிரீன் இன்ஃபோடெயின்மெண்ட் பேனல், வயர்லெஸ் ஸ்மார்ட்போன் கனெக்டிவிட்டி, 8 ஸ்பீக்கர்கள் கொண்ட சவுண்டு சிஸ்டம், பவர்டு முன்பக்க சீட்கள் மற்றும் ஃபுட்வெல் லைட்டிங் ஆகிய வசதிகள் கொடுக்கப்பட்டிருக்கின்றன. இந்தியாவில் விழாக்காலத்தை முன்னிட்டு இந்தப் புதிய ஸ்லாவியா மேட் எடிஷனை வெளியிட்டிருக்கிறது ஸ்கோடா. ஸ்லாவியாவின் லைன்அப்பில் உள்ள வேரியன்ட்களில் ஸ்டைல் வேரியன்டில் மட்டுமே இந்த மேட் எடிஷனை வெளியிட்டிருக்கிறது ஸ்கோடா.
ஸ்கோடா ஸ்லாவியா மேட் எடிஷன்: இன்ஜின் மற்றும் விலை
இந்த ஸ்லாவியா மேட் எடிஷனில் இரண்டு இன்ஜின் மற்றும் மூன்று கியர்பாக்ஸ் தேர்வுகளை அளிக்கிறது ஸ்கோடா. 114hp பவர் மற்றும் 178Nm டார்க்கை உற்பத்தி செய்யும் 1.0 லிட்டர் TSI பெட்ரோல் இன்ஜின் மற்றும் 148hp பவர் மற்றும் 250Nm டார்க்கை உற்பத்தி செய்யும் 1.5 லிட்டர் TSI பெட்ரோல் இன்ஜின் என இரண்டு இன்ஜின் தேர்வுகள் அளிக்கப்பட்டிருக்கின்றன. அதேபோல், 6 ஸ்பீடு மேனுவல், 6 ஸ்பீடு டார்க் கண்வர்ட்டர் ஆட்டோமேட்டிக் மற்றும் 7 ஸ்பீடு DSG ஆட்டோமேட்டிக் ஆகிய மூன்று கியர்பாக்ஸ் தேர்வுகளும் வாடிக்கையாளர்களுக்கு கொடுக்கப்பட்டிருக்கிறது. புதிய ஸ்லாவியா மேட் எடிஷன் மாடலை இந்தியாவில், ரூ.15.52 லட்சம் முதல் ரூ.19.12 லட்சம் வரையிலான எக்ஸ்-ஷோரூம் விலைகளில் விற்பனை செய்யவிருக்கிறது ஸ்கோடா.
