ரூ.1.55 லட்சம் விலையில் வெளியானது ரிவோல்டின் 'RV400 இந்தியா ப்ளூ' ஸ்பெஷல் எடிஷன் எலெக்ட்ரிக் பைக்
இந்தியாவில் விற்பனை செய்யப்பட்டு வரும் தங்களது எலெக்ட்ரிக் பைக்கான 'RV400' பைக்கின் கிரிக்கெட் சிறப்பு எடிஷன் மாடலை வெளியிட்டிருக்கிறது ரிவோல்ட். இந்தியாவில் ஐசிசி ஒருநாள் உலக கோப்பை கிரிக்கெட் தொடர் நடைபெற்று வருவதை முன்னிட்டு, 'RV400 இந்தியா ப்ளூ' என்ற சிறப்பு எடிஷன் மாடலை வெளியிட்டிருக்கிறது அந்நிறுவனம். இந்திய கிரிக்கெட் அணியின் நீல நிற ஜெர்ஸியைக் குறிக்கும் விதமாக, அதே நீல நிறத்திலான புதிய RV400 பைக்கை உருவாக்கியிருக்கிறது ரிவோல்ட். இந்த கலர் மாற்றத்தைத் தவிர, புதிய ஸ்பெஷல் எடிஷன் RV400 மாடலில் வேறு எந்த மாற்றங்களும் செய்யப்படவில்லை. இந்த புதிய ஸ்பெஷல் எடிஷன் பைக்கை வரும் அக்டோபர் 24ம் தேதி முதல் வாங்கிக் கொள்ளலாம்.
ரிவோல்ட் RV400 இந்தியா ப்ளூ: வசதிகள் மற்றும் விலை
இந்த இந்தியா ப்ளூ ஸ்பெஷல் எடிஷன் மாடலானது RV400 பைக்கின் இரண்டாவது ஸ்பெஷல் எடிஷனாகும். முன்னதாக, கடந்த ஆக்ஸட் மாதம் முழுவதும் கருப்பு நிறத்திலான ஸ்டெல்த் பிளாக் லிமிடட் ஸ்பெஷல் எடிஷன் RV400 மாடலை ரிவோல்ட் நிறுவனம் வெளியிட்டிருந்தது குறிப்பிடத்தக்கது. 3kW எலெக்ட்ரிக் மோட்டார் மற்றும் 3.24kWh பேட்டரியுடன், 150 கிமீ ரேஞ்சைக் கொண்டிருக்கிறது இந்த RV400. முழுமையாக சார்ஜ் ஆக இதன் பேட்டரியானது 4.5 மணி நேரம் எடுத்துக் கொள்கிறது. இந்தியாவில் இந்த RV400 இந்தியா ப்ளூ ஸ்பெஷல் எடிஷன் மாடலானது ரூ.1.55 லட்சம் எக்ஸ்-ஷோரூம் விலையில் வெளியாகியிருக்கிறது. விழாக் காலத்தை முன்னிட்டு குறைந்த காலத்திற்கு மட்டும் ரூ.1.40 லட்சம் என்ற சலுகை விலையில் RV400 பைக்கை விற்பனை செய்யவிருக்கிறது ரிவோல்ட்.
