பழைய வாகனங்களை அழிக்கும் வாடிக்கையாளர்களுக்கு சலுகைகளை வழங்கும்படி ஆட்டோமொபைல் நிறுவனங்களுக்கு நிதின் கட்கரி வலியுறுத்தல்
செய்தி முன்னோட்டம்
மத்திய சாலைப் போக்குவரத்து மற்றும் நெடுஞ்சாலைத் துறை அமைச்சர் நிதின் கட்கரி, வாகனங்களை அழிப்பதற்கான சான்றிதழ் வைத்திருக்கும் நுகர்வோருக்குச் சலுகைகளையும் தள்ளுபடிகளையும் வழங்கும்படி வாகன உற்பத்தி நிறுவனங்களை வலியுறுத்தியுள்ளார். 65 வது சியாம் (SIAM) ஆண்டு மாநாட்டில் பேசிய அவர், வாகனங்களை அழிப்பதன் அவசியத்தையும், அதன் நன்மைகளையும் எடுத்துரைத்தார். கடந்த ஆகஸ்ட் 2025 இல் மட்டும் 3 லட்சத்துக்கும் அதிகமான வாகனங்கள் அழிக்கப்பட்டுள்ளன. இதில் 1 லட்சம் அரசு வாகனங்களும் அடங்கும். இந்த வாகன அழிப்பு கொள்கை, மத்திய மற்றும் மாநில அரசுகளுக்கு சுமார் ₹40,000 கோடி வருவாயை ஈட்டித்தரும் என்று கட்கரி கூறினார்.
செலவு குறையும்
உற்பத்தியாளர்களுக்கு செலவு குறையும்
பழைய வாகனங்களிலிருந்து எஃகு, அலுமினியம் போன்ற மூலப்பொருட்களைப் பெறுவதன் மூலம், உற்பத்தியாளர்களுக்கு உற்பத்திச் செலவு குறையும் என்றும், காரீயம் மற்றும் பிளாட்டினம் போன்ற அரிய உலோகங்களை வெட்டியெடுக்கும் தேவை குறையும் என்றும் அவர் குறிப்பிட்டார். வாகனங்களை அழிப்பதற்கான சான்றிதழ்களை ஊக்குவிப்பதன் மூலம், நுகர்வோர் பழைய வாகனங்களை அழிப்பதற்கு ஊக்கமளிக்க வேண்டும் என்று அவர் கேட்டுக் கொண்டார். இந்தத் திட்டம் சுமார் 70 லட்சம் வேலைவாய்ப்புகளை உருவாக்கும் என்றும், கரியமில வாயு வெளியேற்றத்தைக் குறைக்கும் என்றும் அவர் கூறினார். மேலும், போக்குவரத்துத் துறை சுமார் 40% காற்று மாசுபாட்டிற்கு காரணமாக இருப்பதால், சுத்தமான எரிசக்திக்கு மாறுவது அவசியம் என்று கட்கரி வலியுறுத்தினார்.