இந்தியாவில் ஐந்து புதிய கார்களை களமிறக்கும் நிஸான்
செய்தி முன்னோட்டம்
இந்தியா மற்றும் உலகின் பிற வளர்ந்து வரும் ஆட்டோமொபைல் சந்தைகளில் ஐந்து புதிய கார்களை வெளியிடத் திட்டமிட்டு வருகிறது ஜப்பானைச் சேர்ந்த கார் தயாரிப்பு நிறுவனமான நிஸான்.
இந்த ஐந்து கார்களில், நான்கு புதிய கார் மாடல்களும், ஏற்கனவே விற்பனையில் இருக்கும் மேக்னைட் மாடலின் ஃபேஸ்லிப்ட் வெர்ஷன் ஒன்றும் அடக்கம்.
நான்கு புதிய கார் மாடல்களில், இரண்டு எஸ்யூவிக்கள், ஒரு எம்பிவி மற்றும் ஒரு தொடக்க நிலை எலெக்ட்ரிக் கார் என்ற லைன்அப்பை வெளியிடும் திட்டம் வைத்திருக்கிறது நிஸான்.
இவற்றைத் தவிர்த்து, மேக்னைட் மாடலின் அப்டேட்டட் வெர்ஷனின் வெளியீட்டை 2024ம் ஆண்டின் இறுதியில் நாம் எதிர்பார்க்கலாம்.
நிஸான்
நிஸானின் புதிய கார் மாடல்கள்:
தற்போது இந்தியாவில் மேக்னைட் மாடல் ஒன்றை மட்டுமே விற்பனை செய்து வருகிறது நிஸான். மேக்னைட் மாடலும் அதன் மூன்று ஸ்பெஷல் எடிஷன்களும் மட்டுமே தற்போது விற்பனையில் இருக்கின்றன.
இந்தியாவில் தங்களது கால்தடத்தை ஆழப் பதிக்கவே, புதிய கார் மாடல்களை விரைவில் வெளியிடத் திட்டமிட்டு வருகிறது அந்நிறுவனம்.
ரெனோவின் டஸ்டர் எஸ்யூவி மாடலை அடிப்படையாகக் கொண்ட புதிய எஸ்யூவி, அல்கஸார் மற்றும் சஃபாரி மாடல்களுடன் போட்டியிடும் வகையிலான மூன்று வரிசை சீட்கள் கொண்ட ஒரு எஸ்யூவி என இரண்டு எஸ்யூவிக்களை திட்டமிட்டிருக்கிறது அந்நிறுவனம்.
இவை தவிர டிரைபர் மாடலின் துணை மாடலாக புதிய எம்பிவி ஒன்றையும் அதிகபட்ச வாடிக்கையாளர்களைக் குறிவைத்துக் களமிறக்குகிறது நிஸான்.