ஜிஎஸ்டி சீர்திருத்தத்தால் அமலுக்கு வரும் புதிய வரி அடுக்குகள்; இந்திய வாகனத் துறையில் குழப்பம்
செய்தி முன்னோட்டம்
மத்திய அரசின் சரக்கு மற்றும் சேவை வரி (ஜிஎஸ்டி) விகிதங்களை மறுசீரமைக்கும் முன்மொழிவு, இந்திய வாகனத் துறையில் பெரும் குழப்பத்தை ஏற்படுத்தியுள்ளது. அமைச்சர்கள் குழுவால் (GoM) ஏற்கனவே அங்கீகரிக்கப்பட்டுள்ள இந்தத் திட்டம், புதிய வரி விகிதங்கள் குறித்த நிச்சயமற்ற தன்மையை உருவாக்கி, வாகன விற்பனையைப் பாதித்துள்ளது. இந்த முன்மொழியப்பட்ட மறுசீரமைப்பின்படி, 12% மற்றும் 28% ஜிஎஸ்டி அடுக்குகளை நீக்கிவிட்டு, 5% மற்றும் 18% அடுக்குகளைத் தக்கவைத்துக்கொள்வதுடன், ஆடம்பரப் பொருட்களுக்குப் புதியதாக 40% அடுக்கு அறிமுகப்படுத்தப்படும். இந்த மாற்றங்கள் குறித்த விவரங்கள், செப்டம்பர் 3 மற்றும் 4 ஆம் தேதிகளில் நடைபெறவுள்ள ஜிஎஸ்டி கவுன்சில் கூட்டத்திற்குப் பிறகு அறிவிக்கப்படும் என எதிர்பார்க்கப்படுகிறது.
வரி
வரி விபரங்கள்
தற்போது, இந்தியாவில் எரிபொருள் என்ஜின் கொண்ட இரு சக்கர வாகனங்கள், நான்கு சக்கர வாகனங்கள் உள்ளிட்ட அனைத்து வாகனங்களுக்கும் 28% ஜிஎஸ்டி வரி விதிக்கப்படுகிறது. இத்துடன், வாகன வகையைப் பொறுத்து 0% முதல் 22% வரையிலான இழப்பீடு வரியும் (compensation cess) வசூலிக்கப்படுகிறது. புதிய வரி விகிதங்கள் குறித்துத் தெளிவு இல்லாததால், பல டீலர்கள் வாகன இருப்பு வைப்பதைத் தவிர்க்கும்படி அறிவுறுத்தப்பட்டுள்ளனர். நுகர்வோரும் புதிய வாகனங்களை வாங்குவதை ஒத்திவைத்துள்ளனர். இது வாகன விற்பனையில் பெரும் சரிவை ஏற்படுத்தியுள்ளது. பிஎம்டபிள்யூ குரூப் இந்தியாவின் தலைவர் ஹர்தீப் சிங் பிரார், இந்த நிச்சயமற்ற தன்மையால் பொருளாதார வளர்ச்சிக்கு வாகனத் துறையின் பங்களிப்பு பாதிக்கப்பட்டுள்ளதாகக் கூறியுள்ளார்.
கவலைகள்
வாகனத் துறையின் கவலைகள்
பெட்ரோல், டீசல் வாகனங்கள்: சிறிய கார்களுக்கு 18% ஜிஎஸ்டி விதிக்கப்படலாம் என்றும், பெரிய கார்கள் 40% வரி அடுக்குக்கு மாற்றப்படலாம் என்றும் ஊகங்கள் நிலவுகின்றன. மின்சார வாகனங்கள் (EV): ₹20 லட்சத்திற்கு மேல் விலையுள்ள மின்சார வாகனங்களுக்கு 18% ஜிஎஸ்டி விதிக்கப்படலாம் என்று கூறப்படுகிறது. இது மின்சார வாகனங்களை வாங்குவோரைத் தயங்க வைக்கும். இரு சக்கர வாகனங்கள்: 350சிசிக்குக் குறைவான என்ஜின் திறன் கொண்ட இரு சக்கர வாகனங்களுக்கு 18% வரியும், அதற்கு மேல் உள்ளவற்றுக்கு 40% வரியும் விதிக்கப்படலாம் என்ற அச்சம் நிலவுகிறது.
ராயல் என்ஃபீல்டு
இரு சக்கர வாகனங்களுக்கு சீரான வரிவிதிக்க வலியுறுத்தல்
ராயல் என்ஃபீல்டு போன்ற நிறுவனங்கள் இதனால் பாதிக்கப்படும். இரு சக்கர வாகனங்களுக்குச் சீரான 18% வரி விதிப்பது அவசியம் என்று அந்நிறுவனத்தின் தலைவர் சித்தார்த்த லால் வலியுறுத்தியுள்ளார். இந்த மாற்றங்கள், வாகனத் துறையில் நீண்டகால விளைவுகளை ஏற்படுத்தக்கூடும். ஜிஎஸ்டி கவுன்சில் கூட்டம், வாகனத் துறையில் நிலவும் இந்த நிச்சயமற்ற நிலைமைகளுக்கு ஒரு தெளிவான முடிவைக் கொண்டுவரும் என்று எதிர்பார்க்கப்படுகிறது.