சென்னையில் ஃபெராரி கார் ஷோரூம்! 1075 bhp திறன் கொண்ட முதல் எலக்ட்ரிக் காரை அறிமுகம் செய்தது ஃபெராரி
செய்தி முன்னோட்டம்
இத்தாலியின் முன்னணி சொகுசு ஸ்போர்ட்ஸ் கார் தயாரிப்பு நிறுவனமான ஃபெராரி, இந்தியாவில் தனது விற்பனை நெட்வொர்க்கை விரிவாக்கும் நோக்கில் அடுத்த சில மாதங்களில் இரண்டு புதிய ஷோரூம்களை திறக்கவுள்ளதாக அறிவித்துள்ளது. தற்போது மும்பை, டெல்லி மற்றும் பெங்களூரு ஆகிய 3 நகரங்களில் இயங்கி வரும் ஃபெராரி, புதிதாக சென்னை மற்றும் அகமதாபாத் ஆகிய நகரங்களுக்கு தனது சேவையை விரிவாக்குகிறது. இதில் சென்னை ஷோரூமை குன் குழுமமும், அகமதாபாத் ஷோரூமை நவ்னித் குழுமமும் நிர்வகிக்கவுள்ளன.
முதல்முறை
இந்தியாவில் முதன்முறையாக யுனிவெர்சோ ஃபெராரி
இந்திய சந்தையில் உள்ள பிரம்மாண்ட வளர்ச்சி வாய்ப்புகளைக் கருத்தில் கொண்டு, யுனிவெர்சோ ஃபெராரி இந்தியா என்ற சிறப்புக் கண்காட்சியை ஃபெராரி முதன்முறையாக இந்தியாவில் தொடங்கியுள்ளது.
அக்டோபர் 18 முதல் நவம்பர் 1, 2026 வரை நடைபெறும் இந்த கண்காட்சியில், 1968 ஆம் ஆண்டின் டேடோனா மற்றும் 1990-களின் F50 போன்ற பழம்பெரும் கார்கள் முதல் சமீபத்திய 12சிலிண்டரி மாடல் வரை காட்சிப்படுத்தப்பட்டுள்ளன.
மேலும், இந்திய கலாச்சாரத்தைக் கௌரவிக்கும் வகையில் புரோசங்குவே மாடலுக்கு நியூ டெல்லி என்றும், 12சிலிண்டரி மாடலுக்கு வாரணாசி என்றும் புதிய டிசைன்களை அறிமுகப்படுத்தியுள்ளது.
முதல் மின்சார கார்
ஃபெராரியின் முதலாவது மின்சார கார் லூஸ் இவி அறிமுகம்
இந்த கண்காட்சியின் முதன்மை சிறப்பம்சமாக, ஃபெராரியின் வரலாற்றிலேயே முதன்முறையாக உருவாக்கப்பட்டுள்ள லூஸ் இவி என்ற முழுமையான மின்சார கார் இந்தியாவில் முதன்முறையாக காட்சிப்படுத்தப்பட்டது.
இது ஃபெராரியின் முதலாவது 5-சீட்டர் வாகனம் என்பது குறிப்பிடத்தக்கது.
நான்கு சக்கரங்களிலும் தனித்தனியாக பொருத்தப்பட்டுள்ள மோட்டார்கள் மூலம் 1075 bhp அதிவேக ஆற்றலையும் 990 Nm டார்க்கையும் இது வெளிப்படுத்துகிறது.
இந்த காருக்கான இந்திய விலை மற்றும் முன்பதிவு விவரங்கள் 2027 ஆம் ஆண்டின் தொடக்கத்தில் அதிகாரப்பூர்வமாக அறிவிக்கப்படும் என எதிர்பார்க்கப்படுகிறது.