அடுத்த 4-6 மாதங்களில் பெட்ரோல் வாகன விலைக்கு இணையாக மாறும் மின்சார வாகனங்களின் விலை: நிதின் கட்கரி
செய்தி முன்னோட்டம்
இந்தியாவில் மின்சார வாகனங்களின் (EV) விலைகள் அடுத்த நான்கு முதல் ஆறு மாதங்களுக்குள் பெட்ரோலில் இயங்கும் வாகனங்களின் விலைக்கு இணையாக இருக்கும் என்று மத்திய சாலைப் போக்குவரத்து மற்றும் நெடுஞ்சாலைகள் துறை அமைச்சர் நிதின் கட்கரி திங்கள்கிழமை (அக்டோபர் 6, 2025) தெரிவித்தார். 20வது FICCI உயர்கல்வி உச்சி மாநாடு 2025 இல் உரையாற்றும் போது அவர் இதைத் தெரிவித்தார். இந்த நிகழ்வில் சுற்றுச்சூழல் அபாயங்களை ஏற்படுத்தும் புதைபடிவ எரிபொருட்களைச் சார்ந்து இருப்பதைக் குறைப்பதன் அவசியம் குறித்தும் அமைச்சர் வலியுறுத்தினார். "எரிபொருள் இறக்குமதிக்காக இந்தியா ஆண்டுதோறும் ₹22 லட்சம் கோடி செலவிடுகிறது. நாட்டின் முன்னேற்றத்திற்குச் சுத்தமான எரிசக்தியை ஏற்றுக்கொள்வது மிகவும் முக்கியம்," என்று கட்கரி கூறினார்.
இலக்கு
ஆட்டோமொபைல் துறையில் இந்தியாவின் இலக்கு
இந்திய ஆட்டோமொபைல் துறையை உலகிலேயே முதலிடத்திற்குக் கொண்டு வருவதே மத்திய அரசின் இலக்கு என்றும் அவர் நம்பிக்கை தெரிவித்தார். "ஐந்து ஆண்டுகளுக்குள், இந்தியாவின் ஆட்டோமொபைல் துறையை உலகிலேயே முதலிடத்திற்குக் கொண்டு வருவதே எங்கள் இலக்கு," என்று அமைச்சர் கூறினார். தற்போது இந்திய ஆட்டோமொபைல் துறையின் அளவு ₹22 லட்சம் கோடியாக உள்ளது. (அமெரிக்கா - ₹78 லட்சம் கோடி, சீனா - ₹47 லட்சம் கோடி). மாற்று எரிபொருள் மற்றும் கழிவு மேலாண்மை குறித்த அரசின் முயற்சிகளையும் அவர் சுட்டிக்காட்டினார். சோளத்திலிருந்து எத்தனால் உற்பத்தி செய்வதன் மூலம் விவசாயிகள் கூடுதலாக ₹45,000 கோடி சம்பாதித்துள்ளனர் எனவும் அவர் கூறினார்.