புதிய 'C3 ஏர்கிராஸ்' எஸ்யூவியின் விலை விபரங்களை வெளியிட்ட சிட்ரன்
செய்தி முன்னோட்டம்
கடந்த செப்டம்பர் 15ம் தேதியன்று இந்தியாவில் புதிய C3 ஏர்கிராஸ் எஸ்யூவி அறிமுகப்படுத்தியது சிட்ரன். ஹூண்டாய் கிரெட்டாவுடன் போட்டியிடும் இந்தப் புதிய மாடலை யூ, பிளஸ் மற்றும் மேக்ஸ் என மூன்று வேரியன்ட்களாக விற்பனை செய்யவிருக்கிறது அந்நிறுவனம்.
இந்த மாடலின் தொடக்க நிலை வேரியன்டின் விலையை மட்டும் அந்நிறுவனம் அறிவித்திருந்த நிலையில், தற்போது பிற வேரியன்ட்களின் விலைகள் குறித்த விபரங்களையும் வெளியிட்டிருக்கிறது சிட்ரன்.
இந்தியாவில் ரூ.9.99 லட்சம் எக்ஸ்-ஷோரூம் விலையில் தொடங்கும் சிட்ரன் C3 ஏர்கிராஸ் எஸ்யூவி மாடலின் டெலிவரிக்களை இந்த அக்டோபர் மாதம் 15ம் தேதி முதல் துவக்கத் திட்டமிட்டிருக்கிறது அந்நிறுவனம்.
மூன்று வேரியன்ட்களாக, 5 மற்றும் 7 சீட்டர் தேர்வுகளில் 10 நிறத் தேர்வுகளுடன் அறிமுகமாகியிருக்கிறது சிட்ரன் C3 ஏர்கிராஸ்.
சிட்ரன்
சிட்ரன் C3 ஏர்கிராஸ்: விலை
ஐந்து சீட்கள் கொண்ட சிட்ரன் C3 ஏர்கிராஸ் எஸ்யூவி மாடலின் யூ வேரியன்டானது ரூ.9.99 லட்சம் ரூபாயில் விற்பனை செய்யப்படவிருக்கிறது. இதனைத் தொடர்ந்து, பிளஸ் மற்றும் மேக்ஸ் வேரியன்ட்களுக்கு ரூ.11.34 லட்சம் மற்றும் ரூ.11.99 லட்சம் விலையை நிர்ணயித்திருக்கிறது சிட்ரன்.
5+2 சீட்கள் கொண்ட சிட்ரன் C3 மாடலில் யூ வேரின்ட் இல்லை, பிளஸ் மற்றும் மேக்ஸ் வேரியன்ட்கள் மட்டுமே. இதில் பிளஸ் வேரியன்டானது ரூ.11.69 லட்சம் விலையிலும், மேக்ஸ் வேரியன்டானது ரூ.12.34 லட்சம் விலையிலும் விற்பனை செய்யப்படவிருக்கிறது.
இந்த சிட்ரன் C3 ஏர்கிராஸ் எஸ்யூவியில் 109hp பவர் மற்றும் 190Nm டார்க்கை உற்பத்தி செய்யும், 6-ஸ்பீடு கியர்பாக்ஸூடன் இணைக்கப்பட்ட 1.2 லிட்டர் டர்போ பெட்ரோல் இன்ஜினைக் கொடுத்திருக்கிறது சிட்ரன்.