டிசம்பர் 15 முதல் பாரத் என்சிஏபி திட்டம் தொடக்கம்
செய்தி முன்னோட்டம்
இந்திய தரத்திற்கு ஏற்ப கொண்டு வரப்பட்டுள்ள பாரத் என்சிஏபி என்ற கார் பாதுகாப்பு தர மதிப்பீட்டுத் திட்டமானது, டிசம்பர் 15 முதல் கார்களுக்கு விபத்து சோதனைகளை நடத்தத் தொடங்கும்.
முதலில் அக்டோபர் 1 ஆம் தேதி, இந்த திட்டம் தொடங்கப்படவிருந்த நிலையில், விடுமுறை காலம் மற்றும் பணியாளர்கள் பற்றாக்குறை காரணமாக ஒத்திவைக்கப்பட்டது.
குளோபல் என்சிஏபியில் இருந்து உத்வேகம் பெற்று வடிவமைக்கப்பட்டுள்ள பாரத் என்சிஏபியின் குறிக்கோள், இந்தியாவில் உற்பத்தி செய்யப்படும் கார்களின் பாதுகாப்பு அம்சங்களை மேம்படுத்துவதாகும்.
ஆரம்ப கட்டத்தில், இந்திய, ஜப்பான் மற்றும் கொரிய உற்பத்தியாளர்களின், 36 க்கும் மேற்பட்ட கார்கள் சோதனைக்கு உட்படுத்தப்படும்.
Bharat NCAP begins test from December 15
பாரத் என்சிஏபி தர சோதனையில் பங்கேற்பது கட்டாயமில்லை
பாரத் என்சிஏபியில் பங்கேற்பது நிறுவனங்களின் விருப்பத்திற்கு உட்பட்டது என்றும், வாகன உற்பத்தியாளர்கள் தங்கள் மாடல்களை சோதிக்க வேண்டுமா என்பதை அவர்களே முடிவு செய்வார்கள் என்றும் கூறப்படுகிறது.
இந்த வாகன சோதனை நடைமுறைகள், குளோபல் என்சிஏபியை ஒத்திருக்கிறது. அதில் வயது வந்தோர் பாதுகாப்பு, குழந்தை பாதுகாப்பு மற்றும் பாதுகாப்பு உதவி தொழில்நுட்பங்கள் ஆகியவற்றின் அடிப்படையில் வாகனங்கள் மதிப்பிடப்படுகின்றன.
சர்வதேச தானியங்கி தொழில்நுட்ப மையம், இந்திய வாகன ஆராய்ச்சி மையம் மற்றும் குளோபல் ஆட்டோமோட்டிவ் ரிசர்ச் போன்ற நிறுவனங்களால் இந்த சோதனை மேற்கொள்ளப்படும்.
பாரத் என்சிஏபியின் கீழ் சோதனை செய்யப்படும் வாகனங்கள், ஆட்டோமோட்டிவ் இந்தியன் ஸ்டாண்டர்டு படி புள்ளிகளைப் பெறும் மற்றும் அவற்றின் செயல்திறனின் அடிப்படையில் பூஜ்ஜியத்தில் இருந்து ஐந்து நட்சத்திரங்கள் வரை மதிப்பீடு செய்யப்படும்.