தானியங்கி காரை அறிமுகப்படுத்திய பெங்களூருவைச் சேர்ந்த ஸ்டார்ட்அப் நிறுவனம்!
பெங்களூருவைச் சேர்ந்த ஸ்டார்ட்அப் நிறுவனமான மைனஸ் ஜீரோ நிறுவனம், புதிய தானியங்கி எலெக்ட்ரிக் காரான zPod என்ற காரை அறிமுகப்படுத்தியிருக்கிறது. தாங்கள் ஒரு ஆட்டோமொபைல் நிறுவனம் அல்ல, ஒரு தொழில்நுட்ப நிறுவனம் மட்டுமே என்பதையும் தெளிவுபடுத்தியிருக்கிறது மைனஸ் ஜீரோ. தாங்கள் வாகனங்களைத் தயாரிப்பதில்லை எனவும், ஒரு வாகனத்திற்குத் தேவையான தானியங்கி தொழில்நுட்பத்தை மட்டுமே தாங்கள் உருவாக்குவதாகவும் அந்நிறுவனம் தெரிவித்திருக்கிறது. அந்தத் தானியங்கி தொழில்நுட்பத்தை சந்தையில் காட்சிப்படுத்தவே zPod காரை உருவாக்கியிருக்கிறது மைனஸ் ஜீரோ. சாலை விபத்துக்களைத் தடுக்கவும், போக்குவரத்து நெரிசலைக் குறைக்கவும் இந்தத் தொழில்நுட்பத்தை உருவாக்கியிருப்பதாகத் தெரிவித்திருக்கிறது அந்நிறுவனம். மேலும், தங்களுடைய இந்த புதிய தானியங்கி தொழில்நுட்பம் எப்படி இயங்குகிறது என்பது குறித்து விரிவாக விளக்கமளித்திருக்கிறது மைனஸ் ஜீரோ.
என்ன விதமான தொழில்நுட்பம் பயன்படுத்தப்பட்டிருக்கிறது?
பொதுவாக தானியங்கி கார்களில் 'Lidar' தொழில்நுட்பமே பயன்படுத்தப்படும். ஆனால், இந்த வாகனத்தில் ஆறு கேமராக்களைப் பயன்படுத்தியிருக்கிறது மைனஸ் ஜீரோ. முன்பக்கம் மற்றும் பின்பக்கம் இரண்டு கேமராக்கள், பக்கவாட்டுகளில் நான்கு கேமராக்கள் என மொத்தம் ஆறு கேமராக்கள் இந்த தொழில்நுட்பத்தில் பயன்படுத்தப்பட்டிருப்பதாகத் தெரிவித்திருக்கிறது அந்நிறுவனம். இந்தக் கேமராக்களையே சென்சார்களாகப் பயன்படுத்தி இந்த வாகனம் இயங்கிறதாம். மேலும், இந்த தொழில்நுட்பத்தை புதிய கார்களில் மட்டுமல்லாமல், ஏற்கனவே நாம் பயன்படுத்தி வரும் கார்களிலும் இன்ஸ்டால் செய்ய முடியும் எனத் தெரிவித்திருக்கிறது மைனஸ் ஜீரோ நிறுவனம். இந்த zPod காரை தயாரிக்கும் முடிவு எதுவும் இல்லை எனவும், தங்களுடைய தொழில்நுட்பத்தைக் கொண்டு வாகன தயாரிப்பு நிறுவனங்களுக்கு புதிய வாய்ப்புகளை உருவாக்கித் தர விரும்புவதாகவுமே அந்நிறுவனம் தெரிவித்திருக்கிறது.
இந்த காலவரிசையைப் பகிரவும்