சீன எலக்ட்ரிக் வாகன இறக்குமதிக்கு 100% சுங்கவரி; கனடா பிரதமர் ஜஸ்டின் ட்ரூடோ அதிரடி அறிவிப்பு
கனடா அரசாங்கம் சீனாவில் தயாரிக்கப்பட்ட மின்சார வாகனங்களின் இறக்குமதிக்கு 100 சதவீத சுங்க வரி விதித்து உத்தரவிட்டுள்ளது. அமெரிக்கா இந்த நடவடிக்கையை எடுத்த நிலையில், அதை தற்போது கனடாவும் பின்பற்றியுள்ளது. கூடுதலாக, கனடா பிரதமர் ஜஸ்டின் ட்ரூடோ, சீன எஃகு மற்றும் அலுமினியம் மீது 25 சதவீத சுங்க வரியை அறிவித்தார். இதுதொடர்பாக நடந்த அமைச்சரவை கூட்டத்தில் இந்த பிரச்சினை குறித்து உரையாற்றிய ட்ரூடோ, உலக சந்தையில் தன்னை நியாயமற்ற முறையில் நிலைநிறுத்த சீனா முயற்சி செய்வதாக விமர்சித்தார். முன்னதாக, அமெரிக்காவைப் பின்பற்றி ஐரோப்பிய ஒன்றிய ஆணையமம் இதேபோன்ற ஒரு அறிவிப்பை சமீபத்தில் வெளியிட்டது குறிப்பிடத்தக்கது.
கனடா சுங்கவரி உயர்வுக்கு அமெரிக்கா ஊக்குவிப்பு
அமெரிக்க தேசிய பாதுகாப்பு ஆலோசகர் ஜேக் சல்லிவன் முன்னதாக ஞாயிற்றுக் கிழமை ட்ரூடோவை சந்திப்பின் போது, கனடாவும் இதைச் செய்யுமாறு ஊக்குவித்தார். தற்போது கனடாவில் இறக்குமதி செய்யப்பட்ட சீனத் தயாரிப்பான மின்சார வாகனங்கள் டெஸ்லாவிடமிருந்து மட்டுமே உள்ளன. இவை டெஸ்லா நிறுவனத்தின் ஷாங்காய் தொழிற்சாலையில் தயாரிக்கப்பட்டது. தற்போது சீன-பிராண்டட் எலக்ட்ரிக் வாகனங்கள் எதுவும் விற்கப்படவில்லை அல்லது இறக்குமதி செய்யப்படவில்லை. வட அமெரிக்காவில் ஒருங்கிணைந்த வாகனத் துறை இருப்பதால், அமெரிக்கா மற்றும் ஐரோப்பிய ஒன்றியத்தில் உள்ள தனது நட்பு நாடுகளுடன் இணைந்து கனடா செயல்படும் என்று கனடா அரசு கூறியுள்ளது. சீனாவின் அதிகப்படியான விநியோகத்திற்கு கனடா ஒரு குப்பை கொட்டும் இடமாக மாறாமல் இருப்பதை தனது அரசாங்கம் உறுதி செய்யும் என்று மேலும் தெரிவித்துள்ளது.
