ஈரான் துறைமுகங்களுக்கு அமெரிக்கா மீண்டும் கடல்சார் முற்றுகை: 4வது நாளாக வான்வழித் தாக்குதல் தீவிரவடைந்தது
செய்தி முன்னோட்டம்
ஈரான் துறைமுகங்கள் மற்றும் அதன் கடற்கரை பகுதிகளுக்கு செல்லும் மற்றும் அங்கிருந்து வெளியேறும் கப்பல்களின் போக்குவரத்தை முடக்கும் வகையில், ஈரான் மீதான கடல்சார் முற்றுகையை அமெரிக்கா மீண்டும் அமல்படுத்தியுள்ளதாக அமெரிக்க இராணுவம் அதிகாரப்பூர்வமாக உறுதிப்படுத்தியுள்ளது. மத்திய கிழக்கில் பதற்றம் உச்சகட்டத்தை எட்டியுள்ள நிலையில், அமெரிக்காவின் இந்த அதிரடி நடவடிக்கை வளைகுடா பிராந்தியத்தில் பெரும் பரபரப்பை ஏற்படுத்தியுள்ளது. CENTCOM வெளியிட்டுள்ள அறிக்கையின்படி, இந்த கடல்சார் முற்றுகை கிழக்கு நேரப்படி (ET) மாலை 4 மணிக்கு அதிகாரப்பூர்வமாக அமலுக்கு வந்தது. இந்த ராணுவ நடவடிக்கையை வலுப்படுத்த, 20-க்கும் மேற்பட்ட அதிநவீன அமெரிக்க கடற்படைப் போர்க்கப்பல்களும், நூற்றுக்கணக்கான போர் விமானங்களும் மத்திய கிழக்கு பிராந்தியத்தில் முழு வீச்சில் நிலைநிறுத்தப்பட்டுள்ளன.
வான்வழித் தாக்குதல்கள்
ஈரானில் தொடரும் அமெரிக்காவின் வான்வழித் தாக்குதல்கள்
ஹார்முஸ் நீரிணையில் சர்வதேச வணிக கப்பல்கள் மீது ஈரான் நடத்தும் தாக்குதல் திறனை முற்றிலுமாக அழிக்கும் நோக்கில், அமெரிக்கப் படைகள் தொடர்ந்து 4-வது நாளாக ஈரானில் வான்வழித் தாக்குதல்களை மேற்கொண்டு வருகின்றன.
அமெரிக்காவின் இந்த புதிய அலை தாக்குதல்களை தொடர்ந்து, ஈரான் நாட்டின் முக்கிய நகரங்களில் அடுத்தடுத்து சக்திவாய்ந்த குண்டுகள் வெடித்துள்ளதாக ஈரானிய அரசு ஊடகங்கள் தெரிவித்துள்ளன.
பந்தர் அப்பாஸ், அஹ்வாஸ், சிரிக் பகுதிக்கு அருகிலும் ஏவுகணைகள் தாக்கியுள்ளதாகத் தகவல்கள் வெளியாகியுள்ளன.
சுங்க கட்டணம்
டிரம்ப் திரும்ப பெற்ற 20% கட்டண அச்சுறுத்தல்
முன்னதாக, ஹார்முஸ் நீரிணை வழியாகச் செல்லும் சர்வதேசக் கப்பல்களுக்குப் பாதுகாப்பு வழங்குவதற்காக 20 சதவீதக் கட்டணம் விதிக்கப்படும் என்று அமெரிக்க அதிபர் டொனால்ட் டிரம்ப் அச்சுறுத்தியிருந்தார்.
ஆனால், தற்போது அந்த முடிவை அவர் திரும்பப் பெற்றுள்ளார்.
இதற்கு மாற்றாக, வளைகுடா நாடுகளுடன் அமெரிக்கா மேற்கொள்ளவுள்ள பிரம்மாண்ட வர்த்தக மற்றும் முதலீட்டு ஒப்பந்தங்கள் மூலமாக இந்த பாதுகாப்புச் செலவுகள் ஈடுசெய்யப்படும் என டிரம்ப் தனது 'ட்ரூத் சோஷியல்' தளத்தில் பதிவிட்டுள்ளார்.