உக்ரைனில் இந்திய மருந்து நிறுவன கிடங்கு மீது ரஷ்யா ஏவுகனை தாக்குதலா? உக்ரைனின் குற்றச்சாட்டால் பரபரப்பு
செய்தி முன்னோட்டம்
சனிக்கிழமை (ஏப்ரல் 12) உக்ரைன் தலைநகர் கீவில் உள்ள இந்திய மருந்து நிறுவனமான குசுமின் கிடங்கை ரஷ்ய ஏவுகணை தாக்கியதாக தகவல் வெளியாகியுள்ளது. இது இராஜதந்திர ரீதியிலான கவலையைத் தூண்டியது. இந்தியாவுடன் சிறப்பு நட்பு கொண்டிருப்பதாக கூறிக்கொள்ளும் ரஷ்யா, உக்ரைனில் உள்ள இந்திய வணிகங்களை வேண்டுமென்றே குறிவைத்து தாக்கி வருவதாக இந்தியாவில் உள்ள உக்ரைன் தூதரகம் குற்றம் சாட்டியது. தாக்குதலுக்கு உள்ளானதாகக் கூறப்படும் உக்ரைனின் மிகப்பெரிய மருந்து நிறுவனங்களில் ஒன்றான குசும், இந்திய தொழிலதிபர் ராஜீவ் குப்தாவுக்குச் சொந்தமானது மற்றும் அத்தியாவசிய மனிதாபிமான மருத்துவப் பொருட்களை வழங்குகிறது.
கண்டனம்
மருந்து கிடங்குகள் மீதான தாக்குதலுக்கு கண்டனம்
அழிக்கப்பட்ட மருந்துகள் குழந்தைகள் மற்றும் முதியவர்களுக்கானவை எனக் கூறியுள்ள இந்தியாவுக்கான உக்ரைன் தூதரகம், தாக்குதலை கடுமையாக கண்டித்துள்ளது. இதற்கிடையே, சம்பவத்தில் ஏற்பட்ட உயிரிழப்புகளையும் அல்லது சேதத்தின் முழு அளவையும் உக்ரைன் அரசு உறுதிப்படுத்தவில்லை என்றாலும், இந்த தாக்குதல் சர்வதேச அளவில் எச்சரிக்கைகளை எழுப்பியுள்ளது. உக்ரைனின் அறிக்கைக்கு முன்னதாக, உக்ரைனுக்கான பிரிட்டிஷ் தூதர் மார்ட்டின் ஹாரிஸ், முக்கிய மருந்துக் கிடங்கின் அழிவுக்கு ஏவுகணைகள் அல்ல, ரஷ்ய ட்ரோன்கள் தான் காரணம் என்று தெரிவித்தார். இந்தச் செயலை, பொதுமக்களுக்கு எதிரான ரஷ்யாவின் தொடர்ச்சியான பயங்கரவாத நடவடிக்கையின் ஒரு பகுதி என்று கூறி, கிடங்கு தளம் போல் தோன்றிய இடத்திலிருந்து புகை மற்றும் தீப்பிழம்புகள் எழுவதைக் காட்டும் ஒரு படத்தை ஹாரிஸ் சமூக ஊடகங்களில் பகிர்ந்து கொண்டார்.