இதய நோயால் மயங்கி விழுந்த தாய்லாந்து இளவரசி - 3 வாரமாகியும் சுயநினைவு திரும்பவில்லை
தாய்லாந்தின் மஹா வஜிரலோங்கோரனின் முதல் மனைவியின் ஒரே மகள் இளவரசி பஜ்ராகிதியாபா மஹிடோல் ஆவார். 44 வயதாகும் இவர் நவம்பர் 15ம் தேதி பாங்காக் நகரம் அருகே தனது வளர்ப்பு நாய்களுக்கு பயிற்சியளிக்க ஓர் நிகழ்ச்சிக்கு சென்றுள்ளார். இந்த நிகழ்ச்சியில் பங்கேற்ற மஹிடோல் திடீரென மயக்கமிட்டு அங்கேயே சரிந்துள்ளார். இதனையடுத்து மயங்கி விழுந்த இளவரசியை பாங்காக்கில் உள்ள மருத்துவமனைக்கு அழைத்து சென்றனர். இதனையடுத்து அவருக்கு தீவிர சிகிச்சையளித்த மருத்துவர்கள் இதய நோய் பாதிப்பு காரணமாகவே அவர் மயங்கி விழுந்தார் என்று தெரிவித்தனர்.
இளவரசியின் இதயம், கிட்னி மற்றும் நுரையீரலை மருத்துவ உபகரணங்கள் கொண்டு இயக்கம்-மருத்துவர்கள் தகவல்
இளவரசியின் உடல் நிலையில் சற்று முன்னேற்றம் உள்ளது எனினும் இதயத்துடிப்பு சரியாக இயங்காத காரணத்தினால் மருத்துவர்கள் தொடர்ந்து கண்காணித்து வருகிறார்கள் என்று அரண்மனை சார்பில் முன்னதாக தெரிவிக்கப்பட்டிருந்தது. இந்நிலையில் இச்சம்பவம் நடந்து 3 வாரம் ஆகியதையடுத்து, தற்போது இளவரசியின் உடல்நிலை குறித்து அரண்மனை மீண்டும் ஓர் அறிக்கையினை வெளியிட்டுள்ளது. அதன்படி, "மயங்கி விழுந்த இளவரசி மஹிடோலுக்கு இன்னும் சுயநினைவு திரும்பவில்லை, மருத்துவர்கள் தொடர்ந்து அவருக்கு சிகிச்சை அளிப்பதோடு, இதயம், கிட்னி மற்றும் நுரையீரல் முதலியனவற்றை மருத்துவ உபகரணங்கள் கொண்டு இயக்கி வருகிறார்கள். மருத்துவர்கள் அவரை தொடர்ந்து கண்காணித்து வருகிறார்கள்" என்று தெரிவிக்கப்ட்டுள்ளது.
