வடகொரியாவுக்கு பதிலடி: தென் கொரியா, அமெரிக்கா, ஜப்பான் இணைந்து நடத்தும் ஏவுகணை பயிற்சிகள்
செய்தி முன்னோட்டம்
ராணுவ ஒத்துழைப்பை மேம்படுத்துவதற்கும், வட கொரியாவின் ஏவுகணை அச்சுறுத்தல்களுக்கு பதிலடி கொடுப்பதற்கும், தென் கொரியா, அமெரிக்கா மற்றும் ஜப்பான் ஆகிய நாடுகள் இணைந்து கூட்டு கடற்படை ஏவுகணை பாதுகாப்பு பயிற்சிகளை திங்களன்று(ஏப் 17) நடத்தியது.
இராணுவ ஒத்துழைப்பை அதிகரிக்க, வழக்கமான ஏவுகணை பாதுகாப்பு மற்றும் நீர்மூழ்கி எதிர்ப்பு பயிற்சிகளை நடத்துவதற்கு வாஷிங்டனில் நடந்த பேச்சுவார்த்தையில் மூன்று நாடுகளும் ஒப்புக்கொண்டன.
தென் கொரியா, ஜப்பான் மற்றும் அமெரிக்காவை எச்சரிக்கும் விதமாக வடகொரியா சமீபகாலமாக தன் ஏவுகணை சோதனையை அதிகரித்துள்ளது.
கடந்த வெள்ளிக்கிழமை புதிய திட-எரிபொருள் கண்டம் விட்டு கண்டம் பாயும் ஏவுகணையை வடகொரியா சோதித்தது.
details
"முத்தரப்பு பாதுகாப்பையும் ஒத்துழைப்பையும் வலுப்படுத்தும் முயற்சி"
தென் கொரியா மற்றும் அமெரிக்கா இணைந்து நடத்தும் ராணுவ பயிற்சிகள் தங்கள் நாட்டிற்கு எதிராக நடத்தப்படும் சதி என்று வடகொரியா சமீபத்தில் கூறி இருந்தது.
தென் கொரியாவிற்கும் ஜப்பானுக்கும் இடையிலான சர்வதேச கடற்பகுதியில் திங்கட்கிழமை நடத்தப்பட்ட பயிற்சிகளில் தென் கொரியாவின் 7,600 டன் எடையுள்ள ஏஜிஸ் அழிப்பான் யுல்கோக் யி I, அமெரிக்க வழிகாட்டப்பட்ட ஏவுகணை அழிப்பான் பென்ஃபோல்ட் மற்றும் ஜப்பானின் அடாகோ அழிப்பான் ஆகியவை சோதிக்கப்பட்டன.
"வட கொரியாவின் அதிகரித்து வரும் அணு மற்றும் ஏவுகணை அச்சுறுத்தல்களுக்கு எதிராக முத்தரப்பு பாதுகாப்பையும் ஒத்துழைப்பையும் வலுப்படுத்த இது ஒரு வாய்ப்பு" என்று தென் கொரிய கப்பலின் கேப்டன் கிம் கி-யங் ஒரு அறிக்கையில் தெரிவித்துள்ளார்.