150 பலூன்கள் மூலம் குப்பைகளை தென் கொரியாவுக்குள் வீசிய வட கொரியா
செய்தி முன்னோட்டம்
குப்பைகளை சுமந்து செல்லும் குறைந்தது 150 பலூன்களை வட கொரியா, தென் கொரியாவின் மீது வீசியுள்ளது.
இதனையடுத்து, மக்கள் அனைவரும் வீட்டுக்குள்ளேயே இருக்குமாறு தென் கொரிய அதிகாரிகள் எச்சரித்துள்ளனர்.
வெள்ளை பலூன்கள் மற்றும் அவற்றில் இணைக்கப்பட்டுள்ள பிளாஸ்டிக் பைகளில் "அசுத்தமான கழிவுகள் மற்றும் குப்பைகள்" இருப்பதால் அவற்றைத் தொட வேண்டாம் என்று தென் கொரியாவின் இராணுவம் பொதுமக்களை எச்சரித்துள்ளது.
தென் கொரியாவில் உள்ள ஒன்பது மாகாணங்களில் எட்டு மாகாணங்களில் பலூன்கள் கண்டுபிடிக்கப்பட்டு தற்போது ஆய்வு செய்யப்பட்டு வருகிறது.
1950 களில் நடந்த கொரியப் போருக்குப் பிறகு வட கொரியா மற்றும் தென் கொரியா ஆகிய இரண்டு நாடுகளும் அரசியல் பிரச்சாரங்கள் செய்ய பலூன்களைப் பயன்படுத்தி வருகின்றன.
தென் கொரியா
தென் கொரியாவுக்கு பதிலடி கொடுத்த வட கொரியா
அந்த பலூன்களில் வடகொரிய பிரசார துண்டுப் பிரசுரங்கள் உள்ளதா என்பது குறித்து விசாரணை நடத்தி வருவதாக தென் கொரிய ராணுவம் முன்னதாக கூறியிருந்தது.
தென் கொரிய ஆர்வலர்கள் வட கொரிய எல்லை பகுதிகளில் "துண்டுப் பிரசுரங்கள் மற்றும் பிற குப்பைகளை அடிக்கடி வீசிவிட்டு செல்வதாக வட கொரியா சமீபத்தில் குற்றம் சாட்டி இருந்தது என்பது குறிப்பிடத்தக்கது.
மேலும், இது போன்ற செயல்களுக்கு தகுந்த பதிலடி கொடுக்கப்படும் என்று வட கொரியா இரண்டு நாட்களுக்கு முன் கூறி இருந்தது.
இந்நிலையில், 150 பலூன்கள் மூலம் தென் கொரியாவுக்குள் குப்பைகளை வட கொரியா கொட்டியதாக செய்திகள் வெளியாகி உள்ளன.