இந்தியா-ரஷ்யா கலாச்சார உறவுகளில் புதிய மைல்கல்; டெல்லியிலிருந்து அனுப்பிய புத்தரின் புனிதச் சின்னங்கள் கல்மியாவை அடைந்தது
செய்தி முன்னோட்டம்
இந்தியா-ரஷ்யா உறவுகளில் ஒரு குறிப்பிடத்தக்க மைல்கல்லாக, புத்தரின் புனிதச் சின்னங்கள் ரஷ்யாவின் கல்மியா குடியரசின் தலைநகரான எலிஸ்டாவை சென்றடைந்துள்ளன. பொதுவாக புதுதில்லியில் உள்ள தேசிய அருங்காட்சியகத்தில் வைக்கப்பட்டுள்ள இந்தச் சின்னங்கள், உத்தரப் பிரதேச துணை முதலமைச்சர் கேசவ் பிரசாத் மௌரியா தலைமையிலான உயர்மட்ட இந்தியக் குழுவுடன், இந்திய விமானப்படையின் சிறப்பு விமானம் மூலம் கொண்டுசெல்லப்பட்டன. புனித கலைப்பொருட்களை, கல்மியா குடியரசின் தலைவர் பட்டு செர்ஜேயெவிச் காசிகோவ் மற்றும் பிற முக்கிய பிரமுகர்கள் மிகுந்த பக்தியுடன் வரவேற்றனர். ஐரோப்பாவின் ஒரே பூர்வீக பௌத்த மக்கள் வசிக்கும் பகுதியான கல்மியாவில் ஆன்மீக முக்கியத்துவம் வாய்ந்த இடமான சாக்யமுனி புத்தரின் பொன் அடைக்கலம் என்ற மடாலயத்தில் அக்டோபர் 18 வரை இந்தச் சின்னங்கள் பொதுமக்களின் பார்வைக்கு வைக்கப்படும்.
மங்கோலிய பௌத்தம்
108 மங்கோலிய பௌத்த வேதங்கள்
ஒரு வார கால கண்காட்சியில் விரிவான கலாச்சாரப் பரிமாற்றங்கள் இடம்பெற உள்ளன. இதன் ஒரு பகுதியாக, 108 மங்கோலிய பௌத்த வேதங்களின் தொகுப்பான கங்யூர் என்ற வரலாற்றுச் சிறப்புமிக்க நூலை இந்தியா, கல்மிக் மாநிலப் பல்கலைக்கழகத்திற்கு அன்பளிப்பாக வழங்குகிறது. மேலும், இந்தியா 16 புனித பௌத்த கலைப்பொருட்களைக் காட்சிப்படுத்துவதுடன், புத்தரின் புனிதச் சின்னங்களின் வரலாறு மற்றும் மறு கண்டுபிடிப்பு குறித்த கண்காட்சிகளையும் நடத்துகிறது. துணை முதல்வர் மௌரியா, இந்த பயணம் புத்தரின் அமைதி செய்தியைப் பரப்புவதையும், இந்தியா மற்றும் ரஷ்யாவுக்கு இடையே கல்வி மற்றும் கலாச்சார உறவுகளை வலுப்படுத்துவதையும் நோக்கமாகக் கொண்டிருப்பதாகத் தெரிவித்தார். இதற்கு முன்பு மங்கோலியா, தாய்லாந்து மற்றும் வியட்நாம் ஆகிய நாடுகளிலும் இதேபோன்ற கண்காட்சிகள் நடத்தப்பட்டது குறிப்பிடத்தக்கது.