வேட்டைக்காகப் பொதுமக்கள் சுட்டுக் கொலை: போஸ்னியா போரின் கொடூர பின்னணி அம்பலம்
செய்தி முன்னோட்டம்
ஐரோப்பாவில் 1992 முதல் 1995 வரை நீடித்த சரைவோ முற்றுகையின் போது, பணக்கார இத்தாலியர்கள் சிலர் பெரும் தொகையைச் செலுத்தி, வேடிக்கைக்காக அப்பாவிப் பொதுமக்கள் மற்றும் குழந்தைகளைக் கொல்ல போஸ்னியாவுக்குச் சென்றதாகக் கூறப்படும் குற்றச்சாட்டுகள் குறித்து மிலன் அரசு குற்றவியல் விசாரணையைத் தொடங்கியுள்ளது. துப்பாக்கி சுற்றுலா (Sniper Tourism) என்று விவரிக்கப்படும் இந்த நடைமுறையில், போஸ்னிய செர்பியப் படைகள் இத்தாலியப் பார்வையாளர்களை சரைவோவை மேற்பார்வையிடும் மலைகளுக்கு அழைத்துச் சென்றதாகவும், அவர்களுக்குத் துப்பாக்கிகளை வழங்கி, ஆயுதமற்ற பொதுமக்களைச் சுட அனுமதித்ததாகவும் விசாரணையில் தெரிய வந்துள்ளது. சிலர் இதற்காக €100,000 (சுமார் ₹1 கோடி) வரை செலுத்தியதாகத் தகவல்கள் தெரிவிக்கின்றன.
கொலை
ஒரு லட்சத்திற்கும் மேற்பட்ட மக்கள் கொலை
இரண்டாம் உலகப் போருக்குப் பிறகு ஐரோப்பாவின் மிகவும் இரத்தக்களரி மோதல்களில் ஒன்றாகக் கருதப்படும் போஸ்னியப் போரில், 100,000 க்கும் மேற்பட்டோர் கொல்லப்பட்டனர். இந்த விசாரணையானது, இனப்படுகொலையில் தண்டிக்கப்பட்ட ரடோவன் கரட்ஸிக்கின் தலைமையிலான போஸ்னிய செர்பியப் படைகளின் ஆதரவைப் பெற்றவர்கள் மீது கவனம் செலுத்துகிறது. இந்தக் குற்றச்சாட்டை இத்தாலியப் புலனாய்வுப் பத்திரிகையாளர் எசியோ கவசெனி தாக்கல் செய்த புகாரின் அடிப்படையில் விசாரணை தொடங்கப்பட்டுள்ளது. ஆண்களைக் கொல்வதற்கும், பெண்கள் அல்லது குழந்தைகளைக் கொல்வதற்கும் வெவ்வேறு விலைகள் வசூலிக்கப்பட்டதாகக் கூறப்படுகிறது. இந்தக் குற்றச்சாட்டுகள் நிரூபிக்கப்பட்டால், சம்பந்தப்பட்ட இத்தாலிய குடிமக்கள் இத்தாலியச் சட்டத்தின் கீழ் கொடுமை மற்றும் இழிவான நோக்கத்துடன் கூடிய தன்னார்வக் கொலை குற்றச்சாட்டுகளை எதிர்கொள்ள நேரிடும்.