அமெரிக்காவிற்கு போரில் பலத்த அடி! ரூ.8,300 கோடி மதிப்புள்ள அதிநவீன போர் ட்ரோன்களை சுக்குநூறாக்கிய ஈரான்
செய்தி முன்னோட்டம்
அமெரிக்கா மற்றும் ஈரான் நாடுகளுக்கு இடையே நடைபெற்று வரும் போர் தற்போது ஓய்ந்துள்ள நிலையில், நடந்து முடிந்த தீவிரமான தாக்குதல்களில் அமெரிக்க ராணுவம் முன்னெப்போதும் இல்லாத அளவிலான பெரும் பொருளாதார மற்றும் ஆயுத இழப்புகளைச் சந்தித்துள்ள தகவல் வெளியாகியுள்ளது. அமெரிக்க பாதுகாப்புத் தலைமையகமான பென்டகனின் மிக முக்கிய வான்வழி ஆயுதமாக கருதப்படும் எம்கியூ 9 ரீப்பர் ட்ரோன்கள் இந்த மோதலில் பெருமளவில் அழிக்கப்பட்டுள்ளதாக ப்ளூம்பெர்க் ஊடகம் புதிய அறிக்கை ஒன்றை வெளியிட்டுள்ளது. ஈரானின் வான் பாதுகாப்புப் படையினர் நடத்திய அதிரடித் தாக்குதல்களில் அமெரிக்காவின் அதிநவீன ஆளில்லா போர் விமானங்கள் சுக்குநூறாக உடைத்து வீழ்த்தப்பட்டுள்ளன.
பில்லியன் டாலர் இழப்பு
பில்லியன் டாலர் இழப்பைச் சந்தித்த அமெரிக்க பென்டகன் பாதுகாப்புத் துறை
இந்தப் போரின் தொடக்கத்தில் இருந்து இதுவரை சுமார் 24 முதல் 30 எம்கியூ 9 ரீப்பர் ட்ரோன்கள் முழுமையாக அழிக்கப்பட்டுள்ளதாக அமெரிக்க ராணுவ வட்டாரங்கள் அதிகாரப்பூர்வமாகத் தெரிவித்துள்ளன. இதன் மொத்த மதிப்பு இந்திய மதிப்பில் தோராயமாக 8,300 கோடி ரூபாய்க்கும் அதிகம் என்பது குறிப்பிடத்தக்கது. இந்த திடீர் இழப்பானது அமெரிக்காவிடம் இருந்த மொத்த ரீப்பர் ரக ட்ரோன்களின் எண்ணிக்கையில் கிட்டத்தட்ட 20 சதவீதத்தை ஒரேடியாக காலி செய்துள்ளது. இதனால் அமெரிக்க பாதுகாப்புப் படைக்கு வான்வழி உளவுப் பணிகளைத் தொடர்வதில் தற்காலிகமாகப் பின்னடைவு ஏற்பட்டுள்ளது.
நெருக்கடி
அதிநவீன போர் விமானங்களின் உற்பத்தி நிறுத்தத்தால் ஏற்பட்ட நெருக்கடி
தற்போது அழிக்கப்பட்ட எம்கியூ 9 ரீப்பர் ரக ஆளில்லா விமானங்களின் உற்பத்தியை அமெரிக்கா ஏற்கனவே நிறுத்திவிட்டதால் இந்த இழப்பை ஈடுசெய்வது பென்டகனுக்கு பெரும் சவாலாக மாறியுள்ளது. இதன் மேம்பட்ட புதிய மாடலான அவெஞ்சர் ஸ்ட்ரைக் ட்ரோன்கள் மிகக் குறைந்த எண்ணிக்கையிலேயே அமெரிக்க ராணுவத்திடம் தற்சமயம் இருப்பில் உள்ளன. ஈரானின் பலத்த வான் பாதுகாப்பு ஏவுகணைகளை எதிர்கொள்ள முடியாமல் இந்த நவீன ஆளில்லா விமானங்கள் தொடர்ந்து வீழ்த்தப்படுவது சர்வதேச ராணுவ வல்லுநர்களிடையே ஆளில்லா போர் உத்திகள் குறித்த பெரும் சந்தேகங்களை எழுப்பியுள்ளது.
தற்காலிக போர் நிறுத்தம்
தற்காலிக போர் நிறுத்தம் மற்றும் ஆபரேஷன் ஸ்லெட்ஜ்ஹேமர் திட்டம்
சர்வதேச நாடுகளின் தீவிர முயற்சியால் கடந்த ஏப்ரல் 8 ஆம் தேதி முதல் இரு நாடுகளுக்கும் இடையே தற்காலிக போர் நிறுத்தம் நடைமுறையில் இருந்து வருகிறது. எனினும் எல்லையோரப் பகுதிகளில் அவ்வப்போது சிறிய அளவிலான தாக்குதல்களும் கடுமையான அரசியல் விவாதங்களும் தொடர்ந்து நீடித்துக் கொண்டேதான் இருக்கின்றன. இந்த அமைதிப் பேச்சுவார்த்தைகள் தோல்வியடைந்து மீண்டும் போர் மூண்டால் அமெரிக்க அதிபர் டொனால்ட் டிரம்ப் இந்த ராணுவ நடவடிக்கையை "ஆபரேஷன் ஸ்லெட்ஜ்ஹேமர்" என்று புதிய பெயரிட்டு மாற்றத் திட்டமிட்டுள்ளதாக அமெரிக்க ஊடகங்கள் தெரிவிக்கின்றன.