2026 புத்தாண்டைக் கொண்டாடும் முதல் நாட்டிற்கும் கடைசி நாட்டிற்கும் 26 மணிநேர வித்தியாசமா! சுவாரஸ்ய பின்னணி

எழுதியவர் Sekar Chinnappan

Dec 29, 2025

11:15 am

செய்தி முன்னோட்டம்

ஒவ்வொரு ஆண்டும் உலகம் முழுவதும் புத்தாண்டு ஒரே நேரத்தில் கொண்டாடப்படுவதில்லை. பூமியின் சுழற்சி மற்றும் நேர மண்டலங்கள் (Time Zones) காரணமாக, சில நாடுகள் முன்னதாகவும் சில நாடுகள் பல மணிநேரம் கழித்தும் புத்தாண்டை வரவேற்கின்றன. 2026 புத்தாண்டை வரவேற்க உலகம் தயாராகி வரும் நிலையில், அதன் சுவாரசியமான தகவல்கள் இதோ:

முதல் இடம்

முதலில் புத்தாண்டை வரவேற்கும் இடம்

பசிபிக் பெருங்கடலில் அமைந்துள்ள கிரிபட்டி (Kiribati) குடியரசின் ஒரு பகுதியான கிரிட்டிமதி தீவு (Kiritimati Island) தான் உலகிலேயே முதன்முதலில் புத்தாண்டை வரவேற்கும் இடமாகும். இது 'கிறிஸ்துமஸ் தீவு' என்றும் அழைக்கப்படுகிறது. இது UTC+14 நேர மண்டலத்தில் உள்ளதால், இந்திய நேரப்படி டிசம்பர் 31 ஆம் தேதி மதியமே அங்கு புத்தாண்டு பிறந்துவிடும். இதைத் தொடர்ந்து நியூசிலாந்தின் சத்தம் தீவுகள் (Chatham Islands) மற்றும் டோங்கா (Tonga) ஆகிய இடங்கள் புத்தாண்டைக் கொண்டாடும்.

கடைசி இடம்

கடைசியாக புத்தாண்டை வரவேற்கும் இடங்கள்

உலகிலேயே கடைசியாகப் புத்தாண்டைக் கொண்டாடும் இடங்கள் அமெரிக்காவிற்கு அருகில் உள்ள மக்கள் வசிக்காத தீவுகளான பேக்கர் தீவு (Baker Island) மற்றும் ஹவ்லேண்ட் தீவு (Howland Island) ஆகும். இவை UTC-12 நேர மண்டலத்தில் உள்ளன. கிரிட்டிமதி தீவில் புத்தாண்டு பிறந்த சுமார் 26 மணிநேரத்திற்குப் பிறகே இந்தத் தீவுகளில் புத்தாண்டு பிறக்கும்.

கொண்டாட்டங்கள்

முக்கிய நகரங்களின் கொண்டாட்டங்கள்

உலகப் புகழ்பெற்ற நகரங்கள் தங்களுக்குரிய நேர மண்டலத்தின்படி புத்தாண்டை வரவேற்கும். சிட்னி: துறைமுகத்தில் நடைபெறும் பிரம்மாண்ட வாணவேடிக்கை உலகப் பிரசித்தி பெற்றது. டோக்கியோ: ஜப்பானில் உள்ள கோயில்களில் மணிகளை ஒலிக்கச் செய்யும் பாரம்பரிய முறைப்படி புத்தாண்டு வரவேற்கப்படும். லண்டன்: பிக் பென் கடிகாரத்தின் மணியோசையுடன் லண்டன் கண் (London Eye) பகுதியில் கொண்டாட்டங்கள் களைகட்டும். நியூயார்க்: டைம்ஸ் சதுக்கத்தில் நடைபெறும் 'பால் டிராப்' (Ball Drop) நிகழ்வு உலகப்புகழ் பெற்றது.

தகவல்

சுவாரசியமான தகவல்

ஒருவர் விமானத்தின் மூலம் நேர மண்டலங்களைக் கடந்து பயணம் செய்தால், ஒரே நாளில் இரண்டு முறை புத்தாண்டைக் கொண்டாடும் அரிய வாய்ப்பைப் பெற முடியும். உதாரணமாக, புத்தாண்டை வரவேற்ற ஒரு நாட்டிலிருந்து கிளம்பி, இன்னும் புத்தாண்டு பிறக்காத ஒரு நாட்டிற்குச் செல்வதன் மூலம் இதைச் சாத்தியப்படுத்தலாம்.