பின்லாந்தில் காதல் தேட இலவச சுற்றுலா: உலக சிங்கிள்ஸுக்கு 'விசிட் பின்லாந்து' அழைப்பு
செய்தி முன்னோட்டம்
உலகின் மிக மகிழ்ச்சியான நாடாகத் தொடர்ந்து தேர்ந்தெடுக்கப்பட்டு வரும் பின்லாந்து, உலகெங்கிலும் உள்ள சிங்கிள்ஸ்களை தனது நாட்டின் கலாச்சாரம், உணவு முறைகளை அனுபவிக்கவும், அங்கே தங்களது காதலை கண்டறியவும் ஓர் அற்புதமான, அனைத்துச் செலவுகளும் இலவசமான சுற்றுலாவிற்கு அழைப்பு விடுத்துள்ளது. 'விசிட் பின்லாந்து' சுற்றுலா வாரியம் முன்னெடுத்துள்ள இந்த விநோதமான மற்றும் சுவாரசியமான முயற்சி உலகளாவிய இளைஞர்களிடையே மிகப்பெரிய வரவேற்பைப் பெற்றுள்ளது.
சலுகை
16 பேருக்குக் கட்டணமில்லா சொகுசு டேட்டிங்
ஃபின்னிஷ் டின்னர் டேட் என்ற பெயரில் தொடங்கப்பட்டுள்ள இந்தத் திட்டத்தின் கீழ், உலகம் முழுவதிலுமிருந்து 16 தனிநபர்கள் தேர்ந்தெடுக்கப்பட்டு பின்லாந்திற்கு அழைத்துச் செல்லப்படவுள்ளனர்.
வரும் 2027 பிப்ரவரி 9 முதல் பிப்ரவரி 19 வரை 10 நாட்கள் நடைபெறும் இந்தச் சுற்றுலாவில், அந்நாட்டின் தலைநகரான ஹெல்சின்கி மற்றும் டேம்பரே ஆகிய நகரங்களில் பின்லாந்தின் உள்ளூர் சிங்கிள்ஸை சந்திக்கும் சிறப்புக் குழு இரவு உணவு டேட்டிங் நிகழ்வுகள் ஏற்பாடு செய்யப்பட்டுள்ளன.
காட்டு உணவுகள், பெர்ரி பழங்கள் மற்றும் காடுகளிலிருந்து சேகரிக்கப்படும் பிரத்யேக காளான்களை கொண்டு முன்னணி செஃப்களால் தயாரிக்கப்படும் ஃபின்னிஷ் பாரம்பரிய உணவு வகைகளை இவர்கள் ருசிக்கலாம்.
கலாச்சாரம்
பிங்க் கூடையிலிருந்து பிறந்த யோசனை
பின்லாந்தின் பல்பொருள் அங்காடிகளில் புழக்கத்தில் உள்ள சிங்குகோரி என்றழைக்கப்படும் பிங்க் நிற சிங்கிள் கூடை கலாச்சாரத்தை அடிப்படையாகக் கொண்டே இந்த யோசனை உருவானதாக சுற்றுலா வாரியம் தெரிவித்துள்ளது.
சூப்பர் மார்க்கெட்டில் பிங்க் கூடையை ஏந்திச் செல்பவர்கள், தங்களுக்கு இணையான துணையைத் தேடவோ அல்லது அறிமுகமில்லாதவர்களிடம் உரையாடவோ தயாராக இருக்கிறார்கள் என்பதைச் சுட்டிக்காட்டும் ஒரு அடையாளமாக இது பின்பற்றப்பட்டு வருகிறது.
இதே முறையைப் பின்பற்றி, ஐரோப்பாவின் தனித்துவமான உணவுப் பாரம்பரியத்தை பறைசாற்றவும் இந்த இலவச சுற்றுலா வழிவகை செய்கிறது.
விண்ணப்பம்
விண்ணப்பிப்பது எப்படி? தகுதிகள் என்ன?
பின்லாந்தில் வசிக்காத, 18 வயது பூர்த்தியடைந்த உலகின் எந்தவொரு நாட்டைச் சேர்ந்த தனிநபர்களும் இத்திட்டத்திற்குத் தனித்தனியாக விண்ணப்பிக்கலாம்.
விண்ணப்பதாரர்களின் விமானக் கட்டணம், தங்குமிடம், உணவு மற்றும் சுற்றுலா நடவடிக்கைகள் உள்ளிட்ட அனைத்துச் செலவுகளையும் சுற்றுலா வாரியமே முழுமையாக ஏற்றுக்கொள்ளும்.
விருப்பமுள்ளவர்கள், ஆங்கிலத்தில் "ஒரு டின்னர் டேட்டில் நீங்கள் எதை உணவாகப் பரிமாறுவீர்கள், ஏன்?" என்ற கேள்விக்கு விடையளிக்கும் வகையில் ஒரு குறுகிய வீடியோவை பதிவு செய்து, தங்களது இன்ஸ்டாகிராம், டிக்டாக் அல்லது யூடியூப் தளத்தில் #FinnishDinnerDate என்ற ஹேஷ்டேக்குடன் '@VisitFinland' கணக்கைக் குறிப்பிட்டு பதிவிட வேண்டும்.
விண்ணப்பங்களைச் சமர்ப்பிக்க 2026 நவம்பர் 10 கடைசி நாளாகும்; தேர்வு செய்யப்படும் வெற்றியாளர்கள் டிசம்பர் 1 அன்று அதிகாரப்பூர்வமாக அறிவிக்கப்படுவார்கள்.