கலிபோர்னியாவில் இஸ்லாமிய வெறுப்பை விட இந்து மத வெறுப்பு அதிகரித்துள்ளதாக தகவல்
அமெரிக்கா: கலிபோர்னியாவின் சிவில் உரிமைகள் திணைக்களத்தின் (CRD) அறிக்கையின்படி, கலிபோர்னியாவில் இந்து விரோத வெறுப்புக் குற்றங்கள் அதிகரித்துள்ளன. அந்த மாநிலத்தில் மத/இன வெறுப்பு குற்றங்கள் அதிகரித்து வரும் நிலையில் இந்த தகவல் வெளியாகி உள்ளது. கலிபோர்னியாவில் மத வெறுப்பின் முதன்மையான வடிவமாக யூத-வெறுப்பு உள்ளது. அதே சமயம் இஸ்லாமிய வெறுப்பு குற்றங்கள் மூன்றாவது இடத்தைப் பிடித்துள்ளன. இஸ்லாமிய வெறுப்பை பின்னுக்கு தள்ளி இந்து மத வெறுப்பு இரண்டாவது இடத்தை பிடித்துள்ளது. அமெரிக்காவில் இந்து வெறுப்பு அதிகரித்து வருவதாக இந்திய-அமெரிக்க அரசியல்வாதிகள் கவலை எழுப்பி வரும் நிலையில் இந்தத் தகவல்கள் வெளியாகி உள்ளன.
மத வெறுப்பு குற்றங்களை எதிர்த்து போராடி வரும் கலிபோர்னியா
2023 ஆம் ஆண்டில், மத/இன வெறுப்பு குற்றங்களை எதிர்த்துப் போராட கலிபோர்னியா vs ஹேட் கிரைம் திட்டத்தை கலிபோர்னியா அறிமுகப்படுத்தியது. 2022ஆம் ஆண்டில் கலிபோர்னியாவின் மத/இன வெறுப்பு குற்றங்கள் 1,000ஆக உயர்ந்ததை அடுத்து இந்த நடவடிக்கை எடுக்கப்பட்டது. பாதுகாப்பான மற்றும் அநாமதேய முறையில் புகார் அளிப்பதற்கான ஹாட்லைன் மற்றும் ஆன்லைன் போர்ட்டலை இந்த திட்டம் முதலில் அறிமுகப்படுத்தியது. மத/இன வெறுப்பால் குறிவைக்கப்படும் தனிநபர்கள் மற்றும் சமூகங்களை இந்த திட்டம் ஆதரிக்கிறது. மத ரீதியாக தூண்டப்பட்ட சம்பவங்களில், இந்து விரோத குற்றங்கள் 23.3% பதிவாகி உள்ளது. யூத-வெறுப்பு சம்பவங்கள் அதிகபட்சமாக சுமார் 37% பதிவு செய்யப்பட்டுள்ளது. 14.6% பதிவாகியுள்ள முஸ்லிம்களுக்கு எதிரான வெறுப்பு குற்றங்கள் மூன்றாவது இடத்தில் உள்ளன.