மெஸ்ஸியின் இந்திய பயணத்திற்கு ரூ. 89 கோடி? அதிர வைக்கும் செலவு விவரங்களை வெளியிட்ட நிகழ்ச்சி ஏற்பாட்டாளர்!
செய்தி முன்னோட்டம்
கால்பந்து உலகின் ஜாம்பவான் லியோனல் மெஸ்ஸியின் சமீபத்திய இந்திய வருகை மற்றும் அதனால் ஏற்பட்ட சர்ச்சைகள் குறித்து விசாரணை நடைபெற்று வரும் நிலையில், இந்த பயணத்திற்காக செய்யப்பட்ட செலவுகள் குறித்த பிரத்யேக தகவல்கள் வெளியாகியுள்ளன. நிகழ்ச்சியின் முக்கிய ஏற்பாட்டாளரான சதாத்ரு தத்தா போலீஸ் விசாரணையின் போது மெஸ்ஸிக்கு வழங்கப்பட்ட தொகை குறித்துப் பல திடுக்கிடும் தகவல்களைப் பகிர்ந்துள்ளார். சதாத்ரு தத்தா தெரிவித்துள்ள தகவல்களின்படி, இந்த மூன்று நாள் இந்தியப் பயணத்திற்காக லியோனல் மெஸ்ஸிக்கு மட்டும் ரூ. 89 கோடி ஊதியமாக வழங்கப்பட்டுள்ளது. இந்த பணத்திற்காக இந்திய அரசுக்கு செலுத்தப்பட்ட வரி மட்டும் ரூ. 11 கோடி ஆகும். மெஸ்ஸியின் வருகைக்கான மொத்த பட்ஜெட் சுமார் ரூ. 100 கோடி என மதிப்பிடப்பட்டுள்ளது.
தொகை
தொகை விவரங்கள்
1. 30% நிதி - ஸ்பான்சர்கள்: முன்னணி நிறுவனங்களின் விளம்பர ஒப்பந்தங்கள் மற்றும் ஸ்பான்சர்ஷிப் மூலம் 30 சதவீதத் தொகை பெறப்பட்டது. 2. 30% நிதி - டிக்கெட் விற்பனை: ரசிகர்களுக்கு விற்கப்பட்ட அதிக விலை கொண்ட டிக்கெட்டுகள் மூலம் 30 சதவீத நிதி திரட்டப்பட்டது. 3. மீதமுள்ள தொகை: மீதமுள்ள நிதி கார்ப்பரேட் நிறுவனங்களுக்கான பிரத்யேக 'மீட் அண்ட் கிரீட்' (Meet & Greet) அமர்வுகள் மற்றும் பிற வருவாய் வழிகள் மூலம் ஈட்டப்பட்டது.
சர்ச்சை
சர்ச்சையும் விசாரணையும்
கொல்கத்தாவின் சால்ட் லேக் மைதானத்தில் ஏற்பட்ட கூட்ட நெரிசல் மற்றும் ரசிகர்களின் அதிருப்தி காரணமாக சதாத்ரு தத்தா கைது செய்யப்பட்டார். விசாரணையில் அவர் கூறியதாவது: "திட்டமிட்டபடி 150 பேருக்கு மட்டுமே மைதானத்தில் அனுமதி வழங்கப்பட்டது. ஆனால், ஒரு செல்வாக்கு மிக்க நபரின் தலையீட்டால் அந்த அனுமதி அட்டைகளின் எண்ணிக்கை மும்மடங்காக உயர்த்தப்பட்டது. இதுவே குழப்பத்திற்கு முக்கியக் காரணம்." அதிகப்படியான மக்கள் மெஸ்ஸியை தொட முயன்றது மற்றும் கட்டிப்பிடிக்க முயன்றது அவருக்கு மிகுந்த சங்கடத்தை ஏற்படுத்தியதாகவும் அவர் குறிப்பிட்டுள்ளார். தற்போது சதாத்ரு தத்தாவின் வங்கி கணக்குகளில் உள்ள ரூ. 20 கோடிக்கும் அதிகமான தொகையை SIT முடக்கியுள்ளது. சட்டவிரோதப் பணப் பரிமாற்றம் ஏதேனும் நடந்துள்ளதா என்பது குறித்துத் தீவிர விசாரணை நடைபெற்று வருகிறது.