சாதனை நாயகன் விராட் கோலி: 52வது சதம் அடித்து சச்சினின் உலக சாதனையை முறியடித்தார்
செய்தி முன்னோட்டம்
இந்தியா மற்றும் தென்னாப்பிரிக்காவுக்கு இடையேயான முதல் ஒருநாள் கிரிக்கெட் போட்டியில் நடைபெற்ற நிலையில், இந்திய அணியின் நட்சத்திர வீரர் விராட் கோலி தனது 52வது ஒருநாள் சதத்தை அடித்து புதிய உலக சாதனை படைத்துள்ளார். இதன் மூலம், சர்வதேச கிரிக்கெட்டில் ஒரே வடிவிலான போட்டியில் அதிக சதங்கள் அடித்திருந்த ஜாம்பவான் சச்சின் டெண்டுல்கரின் சாதனையை அவர் முறியடித்தார். முன்னதாக, சச்சின் டெண்டுல்கர் டெஸ்ட் கிரிக்கெட்டில் 51 சதங்கள் அடித்து ஒரு வடிவத்தில் அதிக சதங்கள் அடித்தவர் என்ற உலக சாதனையை வைத்திருந்தார். இப்போது, விராட் கோலி தனது 52 வது ஒருநாள் சதத்தை பதிவு செய்ததன் மூலம், சச்சினின் சாதனையை முறியடித்து, ஒரு வடிவத்தில் அதிக சதங்கள் அடித்தவர் என்ற பெருமையைப் பெற்றார்.
டாப் 5
ஒரு வடிவத்தில் அதிக சதங்கள் அடித்த டாப் 5 சாதனைகள்
தற்போது ஒருநாள் கிரிக்கெட் போட்டிகளில் 52 சதங்களுடன் விராட் கோலி முதலிடத்தைப் பிடித்த நிலையில், சச்சின் டெண்டுல்கர் டெஸ்ட் கிரிக்கெட்டில் எடுத்த 51 சதங்கள் இரண்டாவதாக உள்ளது. மூன்றாவது இடத்தில் ஒருநாள் கிரிக்கெட்டில் சச்சின் எடுத்த 49 சதங்கள் உள்ள நிலையில், நான்காவது இடத்தில் ஜாக்கஸ் கல்லீஸின் 45 சதங்கள் மற்றும் ஐந்தாவது இடத்தில் ரிக்கி பாண்டிங்கின் 41 சதங்கள் உள்ளன. ஜாக்கஸ் கல்லீஸ் மற்றும் ரிக்கி பாண்டிங் ஆகிய இருவரும் டெஸ்ட் கிரிக்கெட்டில் இந்த சதங்களை எடுத்துள்ளது குறிப்பிடத்தக்கது.
தென்னாப்பிரிக்கா
தென்னாப்பிரிக்காவுக்கு எதிராக அதிக சதம்
தென்னாப்பிரிக்காவுக்கு எதிராக ஒருநாள் கிரிக்கெட்டில் அதிக சதங்கள் அடித்த வீரர் என்ற சாதனையையும் விராட் கோலி படைத்துள்ளார். தென்னாப்பிரிக்காவுக்கு எதிராக அவர் அடித்த ஆறாவது சதமாக இது பதிவானது. இவருக்கு முன் சச்சின் மற்றும் டேவிட் வார்னர் தலா ஐந்து சதங்கள் அடித்திருந்தனர். ராஞ்சியில் நடைபெற்ற இந்தப் போட்டியில், விராட் கோலி 48 பந்துகளில் சிக்ஸர் அடித்து அரைசதத்தை எட்டினார். தொடர்ந்து சிறப்பாக விளையாடிய அவர், 102 பந்துகளில் சதம் அடித்தார். சதம் அடித்த பிறகு அதிரடியைக் கூட்டிய விராட் கோலி, 39வது ஓவரில் ஐந்து பந்துகளில் 20 ரன்களை விளாசினார். இறுதியில், 135 ரன்கள் எடுத்திருந்தபோது அவர் ஆட்டமிழந்தார்.