எம்எஸ் தோனியின் கோரிக்கையை நிராகரித்த தமிழ்நாடு கிரிக்கெட் சங்கம்
செய்தி முன்னோட்டம்
தமிழ்நாடு கிரிக்கெட் சங்கம் ஆறு வருட இடைவெளிக்குப் பிறகு அகில இந்திய அளவில் புச்சி பாபு தொடரை மீண்டும் அறிமுகப்படுத்தியுள்ளது.
தமிழ்நாடு கிரிக்கெட் சங்கம் அழைப்பிதழ் கொடுக்கும் அணிகள் மட்டுமே பங்கேற்கும் இந்த போட்டி நான்கு நாள் போட்டியாக நடைபெற உள்ளது.
உள்நாட்டு கிரிக்கெட் தொடர் நடக்காத இந்த சமயத்தில், பெரும்பாலான மாநில கிரிக்கெட் சங்கங்கள் உள்நாட்டு டி20போட்டிகளை நடத்தி வரும் நிலையில், தமிழ்நாடு ஆறு வருடத்திற்கு முந்தைய தொடரை மீண்டும் அறிமுகப்படுத்துகிறது.
ரஞ்சிக் கோப்பையில் தமிழகத்தின் மோசமான ஆட்டமும் இந்தப் போட்டிக்கு வருவதற்கு ஒரு காரணம் எனக் கூறப்படுகிறது.
இதில் ஜார்க்கண்ட் அணியையும் சேர்க்க எம்எஸ் தோனி கோரிக்கை விடுத்த நிலையில், அதை தமிழ்நாடு கிரிக்கெட் சங்கம் நிராகரித்துள்ளதாக தகவல் வெளியாகியுள்ளது.
tnca denies ms dhoni request
ஜார்க்கண்ட் அணியை சேர்க்க எம்எஸ் தோனி கோரிக்கை
ஆறு ஆண்டுகளுக்கு பிறகு மீண்டும் நடத்தப்படும் இந்த தொடரில், இந்திய கிரிக்கெட் ஜாம்பவான் எம்எஸ் தோனி, தான் சார்ந்த ஜார்க்கண்ட் அணியையும் சேர்க்க கோரிக்கை வைத்திருந்தார்.
ஆனால், ஏற்கனவே 12 அணிகள் உறுதி செய்யப்பட்டு விட்டதால், தோனியின் கோரிக்கையை நிராகரிக்க வேண்டிய சூழல் ஏற்பட்டு விட்டதாக, தமிழ்நாடு கிரிக்கெட் சங்க செயலாளர் ஆர்ஐ பழனி தெரிவித்துள்ளார்.
ஜார்க்கண்ட் மட்டுமல்லாது சர்வீசஸ் மற்றும் சத்தீஸ்கர் கூட பங்கேற்க விருப்பம் தெரிவித்தாலும் சேர்க்க முடியவில்லை என அவர் மேலும் கூறினார்.
இதற்கிடையே, புச்சி பாபு தொடரை கோயம்புத்தூர், சேலம், திண்டுக்கல் மற்றும் திருநெல்வேலி ஆகிய இடங்களில் நடத்த தமிழ்நாடு கிரிக்கெட் சங்கம் முடிவு செய்துள்ளது. போட்டி ஆகஸ்ட் 15 முதல் செப்டம்பர் 11வரை நடைபெற உள்ளது.