ஆர்சிபிக்கு எதிராக ஷிகர் தவான் ஆடுவது சந்தேகம் : சிக்கலில் பஞ்சாப் கிங்ஸ் அணி
ஐபிஎல் 2023 தொடரில் வியாழன் (ஏப்ரல் 20) அன்று மொஹாலி ஸ்டேடியத்தில் பஞ்சாப் கிங்ஸ் (பிபிகேஎஸ்) ராயல் சேலஞ்சர்ஸ் பெங்களூர் (ஆர்சிபி) அணியை எதிர்கொள்கிறது. பஞ்சாப் கிங்ஸ் அணியின் கேப்டன் ஷிகர் தவான் இன்னும் முழுமையான உடற்தகுதியை பெறவில்லை எனக் கூறப்படுவதால் அணி பின்னடைவை சந்தித்துள்ளது. நடப்பு சீசனில் பிபிகேஎஸ் இதுவரை விளையாடிய ஐந்து போட்டிகளில் மூன்றில் வெற்றியும் இரண்டில் தோல்வியும் அடைந்துள்ளது. முதல் இரண்டு ஆட்டங்களில் கேகேஆர் மற்றும் ஆர்ஆர் அணிகளை தோற்கடித்த பஞ்சாப் அடுத்த இரண்டு போட்டிகளில் எஸ்ஆர்எச் மற்றும் ஜிடியிடம் தொடர் தோல்வியை சந்தித்தது. இந்நிலையில், எல்எஸ்ஜிக்கு எதிரான கடைசி ஆட்டத்தில் சாம் கர்ரன் தலைமையில் பிபிகேஎஸ் வெற்றி பெற்றது மற்றும் ஆர்சிபிக்கு எதிராக வெற்றியை நீட்டிக்க விரும்புகிறது.
பஞ்சாப் கிங்ஸ் அணியில் ஷிகர் தவானின் முக்கியத்துவம்
இந்த ஐபிஎல் சீசனில் பஞ்சாப் கிங்ஸ் அணியின் கேப்டன் ஷிகர் தவான் பேட்டிங்கில் முன்னிலை வகிக்கிறார். அவர் இதுவரை நான்கு ஆட்டங்களில் 146 ஸ்ட்ரைக் ரேட்டில் 233 ரன்களைக் குவித்து அணியின் தற்போதைய அதிக ரன்களை எடுத்தவர் ஆவார். கடைசி ஆட்டத்தில் காயத்தால் அவர் விளையாடவில்லை. மேலும் ராயல் சேலஞ்சர்ஸ் அணிக்கு எதிரான ஆட்டத்திலும் அவர் விளையாடுவதில் சந்தேகம் உள்ளது. இந்த சீசனில் பஞ்சாப் அணியின் வேறு எந்த வீரரும் இதுவரை மொத்தமாக 100 ரன்கள் கூட எடுக்காததால், ஆர்சிபி போன்ற வலுவான பேட்டிங் வரிசையை கொண்டுள்ள ஒரு அணிக்கு எதிராக ஷிகர் தவான் இல்லாததது அணியின் பேட்டிங்கில் சிக்கலை ஏற்படுத்தும் எனத் தெரிகிறது.
